Ua silia i le onosefulu fanau a le atunuu ua i lalo nei o le vaaiga a le Toomaga mo ē Puapuagatia le Samoa Victim Support Group i le nofoaga i Tuanaimato o loo iai fale o loo nonofo ai ia fanau ua aafia i sauaga o le tino ma le mafaufau. O le galuega tele lea a le faalapotopotoga o le tausiga o ia fanau a le atunuu, e lē gata o le taumafa o aso uma, a o lavalava ma mea e nonofo ai ia lelei ma mamā i aso uma.
O le agalelei o le atunuu e lē o masino le tuuina atu o seleni ma isi vaega e pei o lavalava ma meaai, ae e faapena foi i ekalesia ma faalapotopotoga tuma‘oti ma pisinisi. O le ekalesia a Iesu Keriso o le Au Paia o Aso e Gata ai i Samoa, o se tasi lea o Samaria agalelei ua telē lona sao tau foai i le Toomaga. E lē gata o se taavale na faameaalofa e le ekalesia, ae o foai o taumafa.
O le uarota a Siumu ma Saaga i le siteki a Upolu i Saleilua Falealili na latou foai le tele o fua o faatoaga sa faamaopoopo e le siteki e aofia ai ma oloa tau taumafa e pei o taga araisa. E ese lea galelei i le isi foai mai le ekalesia aoao o taga talo e tolusefulu ma ona tupu. O se vaega lea o taga talo sa faamaopoopo e le ekalesia Mamona mo lana fesoasoani i motu o le atunuu o Tonga o loo aafia pea i mafatiaga mai le afā sa taia ai.
O lipoti mai lea atunuu o loo faaalia ai o loo faaletonu pea le itu i faatoaga ona o loo toe toto ufi, taamu ma e tuai lava se taimi e toe foi ai faatoaga i le mea masani ona ua lalo le tele o laau o le vaomatua ma aafia ai foi ma faatoaga. O motu o Haapai ma Vava‘u sa afaina. O le agalelei o lea ekalesia ua faaalia ai foi le agaga o le faafetai e le Pelesetene o le Toomaga le faletua o Vitolina Chang, ona o se fesoasoani malosi lea mo le faalapotopotoga i le tausiga o fanau o loo latou vaaia.
O se foai foi ua lagolago atu ai i le galuega o loo faia pea i aso uma o le fafaga o fanau ma tausi auā o le Toomaga ua avea nei ma o latou aiga e nonofo ai. O se faamāmā avega foi mo le Pelesetene ma le faalapotopotoga i tupe faaalu ia latou fuafuaga mo le tausiga o ia fanau. O lenei faalapotopotoga o loo telē lona sao i le toe faaleleia o olaga o nisi o fanau a le atunuu ua aafia i faiga solitulafono e pei o feusuaiga fai faamalosi, ma feusuaiga lē manaomia aemaise o sauaga i le tino ma le mafaufau.
