O le nofoaga tutotonu o fefaatauaiga le trade center, o faleaiga ma fale faafiafia e fausia i le faataamilosaga o le taligalu i le talafatai o le taulaga o Apia, ma le avea o le maota o le Malo i le eleele fou ma faletalimalo, o nisi ia o atinae tetele ua taulai i ai fuafuaga a le malo i tausaga o loo totoe nei o le paeaiga a le Palemene o iai nei.
O le finagalo lea o le Minisita o Tupe le afioga ia Faumuina Tiatia Liuga i se faatalatalanoaga na fia maua ai sona finagalo i le fuafuaga e fausia ni faleaiga ma ni fale faafiafia i le nofoaga o iai le taligalu i le talafatai o Apia i le vaega o iai le taulaga o le atunuu. Na faaalia ai foi e le minisita i lea faatalatalanoaga o loo silasila le Malo e faatupe le atinae o faleaiga ma fale faafiafia i fesoasoani mai fafo ma se nonogatupe e māmā le tului poo le soft term loan.
Na faailoa e le Palemia, Susuga Tuilaepa L Sailele Malielegaoi i se talanoaga i luga o leitio ma fale televise i le atunuu, e tua atinae tetele o loo fuafua nei i le tafe mai o faamanuiaga i le tamaoaiga o le atunuu ma tagata. Peitai ua fesiligia e le taitai o le Itu Agai le afioga Palusalue Faapo II, pe o fea e aumai ni tupe e faatino ai ia galuega tetele ma e tatau i le Malo ona faailoa poo fea e aumai ai ni seleni. Faaalia e Palusalue i se feiloaiga ma tusitala e tele tupe e manaomia mo le toe fausia o le maota o le Malo o loo i le eleele fou pe afai e toe liliu e avea ma faletalimalo.
Ua valoia e Palusalue Faapo II le sauni o le Malo e siitia le lafoga o oloa ma galuega faatino le VAGST i le tala autū o le Tupe o le a sosoo ai nei, ina ia mafai ona faatupe ai ia atinae. E lei manuia sailiga mo se finagalo o le minisita o tupe i lea valoaga pe moni. Tasi lea o fuafuaga ua mae‘a ona feiloai ai le minisita o tupe ma le asosi a le au faifaletalimalo ma ua lagolagoina e le asosi.
Peitai ua faaalia e le taitai o le Itu Agai, e lē tatau i le Malo ona toe tauva ma le au faipisinisi faletalimalo auā o le faamuamua i faiga faavae a le Malo o le unaia o pisinisi tuma‘oti ia lelei ma manuia. E faasino foi le finagalo lea o Palusalue i le fausia o faleaiga ma falekalapu i le faataamilosaga o le taligalu i Apia, ona e talitonu le taitai o le Itu Agai, o le a taulamua ai le Malo i le faagaioia o ia pisinisi.
