Na usitaia e le tofa Mulitalo Siafausa le faasalaga na faia mumua e le faamasinoga ina ua faamaonia ona moliaga e sefulu o le faia o ni gaioiga matagā.
O se vaega o lea faasalaga o lona totogi lea o le taui tupe e tolu afe tala i le tamaitai na aafia i lana solitulafono ma ua mae‘a. Peitai o le tālia e le faamasinoga o talosaga apili o le talosaga a loia a le Malo ina ia toe silasila i le faasalaga ona e lē talafeagai, ua faatonu ai e lea faamasinoga le toe faia o se isi faaiuga.
O le aso 14 o le masina nei o Tesema, le Aso Faraile o le vaiaso a sau, o le a toe lauina ai se isi faasalaga, lea ua faailoa e le alii faamasinoga o Justice Pierre Slicer, e atagia lava i sana faaiuga o le falepuipui e faasalaina ai lē ua molia.
O le Aso Lulu na tea nei na faatoa mafai ona tulai ai Mulitalo i le faamasinoga e tusa ai ma le faaiuga a le faamasinoga o talosaga apili, lea na faailoa ai i se tusi a lē o loo molia na tuuina atu e lana loia i le faamasinoga, sa mafua ona lē oo atu i le faamasinoga i le Aso Gafua ona sa leai sona silafia e toe valaau ona moliaga ua mae‘a ona faia i ai le faaiuga.
Na faatonuina e le faamasinoga le faia o se tusi saisai mo Mulitalo Siafausa ina ua lē oo atu, peitai ua talia e le faamasinoga lana tusi ua faailoa ai le mafuaaga o lona lē auai i le valaauina o le mataupu. Ua tatala ai pea o ia i tua i ni aiaiga poo se bail, e faatalitali ai le aso 14 o Tesema 2012 o le a toe lauina ai se isi faaiuga i ona moliaga.
O le Aso Gafua foi o lena vaiaso ua mavae na valaau ai le moliaga ua faamaonia e tasi o le faaoolima matagā faasaga i le alii fomai o Le Mamea Dr Emosi Puni, ma ua faatulaga mai ai o le aso 12 o Tesema le Aso Lulu o le vaiaso a sau e lauina ai se faaiuga.
O le tulai ai o Le Mamea Dr Emosi Puni na faatonuina ai e le faamasinoga ina ia nofo taofia i le vaaiga a leoleo i le falepuipui i Tafaigata e faatali ai le aso ua atofaina mo sona faasalaga. O le faatoa nofo taofia lea o le alii fomai i le vaaiga a leoleo talu mai le tausaga e 2005 na faaulu ai le tagi a se tina talavou faasaga i lea tamalii.
O le tausaga e 2006 na fofogaina ai se faaiuga a le faamasinoga maualuga i le moliaga o Le Mamea Dr Emosi lea na faaleaogaina ai le moliaga a leoleo. Peitai na apili lea faaiuga e loia a le Malo ma faia ai le faaiuga a le faamasinoga o talosaga apili i le tausaga e 2007 ina ia faataatia ese lea faaiuga ae toe ave le moliaga e suesueina e se isi faamasino.
O le tausaga nei na faatoa toe faatino ai lea faaiuga ma faamaonia ai le moliaga e tasi o le faaoolima matagā o le alii fomai. Na ia toe apili peitai na teena, ma faatumau ai pea le iuga na faia e le faamasinoga maualuga o le faamaonia o le moliaga.
