“Faafiafia usugafono ma le au tafafao o le Teuila”
Ua faitau vaiaso taunuu i le taligamalo a le atunuu o le a malaga mai ai le silia i le toluafe o tagata mai atunuu eseese o le lalolagi. O i latou ia o le a maimoaina tu ma aganuu a Samoa aemaise o taleni eseese a o tatou tagata faapea foi ona latou tofoina a tatou taumafa ma molimau uiga talimalo o tagata Samoa.
O se tasi foi lea o autu o tapenaga a le sosaiete o le aufaimusika a le atunuu e tapena se latou faafiafiaga e faia i luma o le maota o le Malo ile eleele fou. O le a faasolo lea faafiafiaga mo le lua vaiaso e le gata o le taimi o le fono a malo laiti o le lalolagi ae o le vaiaso foi o le Teuila.
O nisi o le aufaimusika lauiloa a le atunuu e pei o le afioga Muliaga Mamaia mai le faaili logologoā o le Golden Aliis o le a faafiafia ai. O le faaili o le Tama Uli mai Saleimoa o loo faauluulu i le afioga Faumuina poo le tofa Apulu Laneselota Polu, le tamaitai siufofoga mālie o Peta Si‘ulepa, faapea le Y-not o se faaili a alo e faasino i le afioga Toomalatai Siaki Laban mai Matautu i Apia ma nisi lava o le aupepese ma talenia i le musika.
O le fautuaga a le taitai o le Malo le afioga i le Palemia i le sosaiete a le aufaimusika ua iloa i lona igoa puupuu o le SIMAI ina ia faia se faafiafiaga e faalauiloa ai i le lalolagi le latou taleni na mafua ai ona a‘e se finagalo ia i latou o sui o le SIMAI e faatino se latou faafiafiaga faapitoa mo lea taligamalo tele a le atunuu.
O se isi lea o tapenaga e iai le talitonuga o le a tulimatai e le toatele o usugafono o le a malaga i Samoa aemaise foi o tagata tafafao o le a maimoaina le vaiaso o faafiafiaga ma polokalame o le Teuila. O lona uiga o se tasi o faafiafiaga e lē tatau ona misia i le maimoa a o tatou tagata o le a malaga i Samoa mo le Teuila auā o se avanoa e lē au maua o le a toe faafofoga ai i nisi ua iloga o latou tulaga aao i le musika.
O a latou fatuga o le a toe fafagu mai ai nisi o lagona faatama ma teine talavou i tausaga ma aso ua mavae i le faatoa salalau mai o fatuga a ia tamalii o le atunuu. O le masina o Novema e faia ai se faaaliga o musika a le SIMAI o le a tuufaatasia ai ma le aufaimusika i Amerika Samoa ma o se isi foi lea avanoa o le a toe silasila ma faafofoga ai i nei tamafanau a le atunuu lauiloa i le musika.
