E fā vaiaso o loo faasavali ai vespers a le autalavou a le Matagaluega a le Ekalesia Aso Fitu Samoa Tutoatasi a Kuiniselani lea sa amataina i le po o le Aso Faraile 10 o Iulai.
Na uluai tatalaina e le Region a Levi lea e tuufaatasi ai Ekalesia a Inala ma Carole Park. O taitai autalavou o Kay Euese ma Mamele.
O le auga tonu o nei polokalame o sauniga faaleautalavou e saga faamauaaina ai soifua o tupulaga talavou i le galuega a le Atua ma tuuina atu mo le Alii, ae lē gata i lea o le toe faafouga, ma o loo valaaulia ai isi tupulaga talavou ma soo se tagata.
E faatinoina pese faaleagaga, tala faale-Tusi Paia ae faaiu i se upu faalaeiau e le faafeagaiga o le autalavou, le susuga ia Ps Johnny Siofele. E fā Regions o le faisao i po o Aso Faraile taitasi lea e fuafua e faamae‘aina i le faaiuga o Iulai.
O le po o le Aso Faraile a sau nei o le Region a Simeona lea e iai autalotu a Bell Bird Park ma New Town, faapea Reupena e aofia ai ekalesia a Annerly ma SouthSide ae faaiu ia Asera o loo iai aulotu a Leichhardt ma Kingswood.
O le taitai matagaluega o loo tu i le foe i ekalesia e 9 e aofia ai ma Cairns, o le susuga ia Pr Lagolago ma le faletua ia Puataunofo Levae, ae o le komiti lenei a le autalavou matagaluega a Kuiniselani.
Le Komiti a le autalavou a Kiniselani:
Taitai autalavou a le Matagaluega – Tamalelagi Tupai Mata Tufuga
Sui taitai – Vailele Mene
Failautusi – Leau Kolose Toso
Sui failautusi – Vaota Tofaeono
Faifeau – Ps Johnny Siofele
Faatamā – Setiu Iakopo Togipau
