O se faamatalaga lea mai i le Alii Ofisa Sili o le Vaega o Auaunaga faafomai a le Soifua Maloloina ina ua tapa sona finagalo i ni faaseā ua faaleo e tausi soifua faapea ua taofi le totogi atu o a latou alauni ma ovataimi.
O ni faaseā na faamaonia e le Afioga Leota Laki Lamositele ina ua fesiligia e le Samoa Times. O lana faamatalaga, e lē o iai ni tulaga faapea ua faatautaia i le taimi lenei ma o lona foi malamalama “… e lei talanoaina lava le taofia o nei tupe e tatau ona totogi i tausi soifua i taimi e toe valaauina ai mo le latou tautua…”
Faaalia e Leota Laki, e sa‘o tausi soifua o loo tālia lava le mae‘a ai o galuega a le Fono a Faatonu poo le Komiti Faafoe a lea vaega o auaunaga a le Soifua Maloloina ma o le a totogi lava tausi soifua e amata mai ia Iulai i le aso muamua, lea e tatau ona faamamalu ai le siitaga ua mafai mai e le Malo mo tausi soifua.
O le tausaga na tea nei na faamaonia ai e le Kapeneta le siitaga na talosagaina e le Asosi o Tausi Soifua i Samoa. E lei maua atoa le pasene na mananao ai tausi soifua ae o lea ua faamautu.
Faaalia e le Alii Ofisa Sili o le Auaunaga faafomai, e telē le galuega ua faatino nei e le Komiti Faafoe ma le Pulega ina ia toe faataatitia lelei le taiala o totogi, e lē gata i tausi soifua, ae faapea foi tagata faigaluega uma i lalo o lea vaega o le auaunaga faa-Soifua Maloloina.
“E maua lava totogi o tausi soifua ma o tausi soifua lava ia o loo i lalo o le auaunaga lenei o le a taulai i ai suiga nei,” o se faamatalaga lea a le Afioga Leota Laki. Faaalia e Leota o le taimi lenei ua latalata mae‘a lea galuega ma e tatau ona oo atu i le masina fou ua maua le seleni lea a tausi soifua lava ia. O lona uiga o le masina atoa e toe totogi o le siitaga lenei.
Ae i le itu tau i ovataimi ma alauni na ta‘ua e Leota Laki e lei faia i ai se faaiuga pe o le a tuu loa ae faaauau ai a siitaga. Ae na ta‘ua e le Alii Ofisa Sili se‘i fono le Komiti Faafoe poo le Fono a Faatonu i se suiga ae o le taimi lenei e lei talanoaina lava lea mataupu ma e tatau ona toe siaki lelei e tausi soifua o latou totogi pe afai ua aveese alauni ma ovataimi mai i o latou totogi i le taimi lenei.
Faaalia e Leota Laki ua mae‘a ona talanoa le tina ia Faamanatu Nielson, lea o loo Peresitene o le Asosi a Tausi Soifua, ma le Taitaifono o le Auaunaga faafomai ma o le tali foi lea ua avatu i ai o le onosai seia oo i le masina fou.
