O se nuu i Savaii e nonofo ai se ulugalii e aafia uma i siama o le gasegase faigata o le HIV/AIDS lea ua faamatalaina i le gagana faigofie o le faama’i oti. Ua toalima le fanau a le ulugalii o lo la matutua o le 34 ma le 35 tausaga.
O le toatolu o tamaiti matutua e lē o aafia seia vaganā le toalua o tamaiti e aofia ai ma le pepe fou a le ulugalii na fanau i le masina nei o Iulai 2011.
Peitai ua faaalia e se molimau mai le Faalapotopotoga o loo unaia polokalame faalauiloa i le puipuia o Samoa mai le faama’i oti, le faalapotopotoga ua ta’ua o le Samoa AIDS Foundation, o loo faatalitali nei i se lipoti e iloa ai le aafia ma le lē aafia o le pepe i siama o le gasegase faigata o le HIVAIDS.
“Sa faailoa mai e le tina e lē o maua lana pepe ina ua mae’a ona faia ni ana siaki e fomai, ae o loo matou faatali i se lipoti a le falemai e faamautu ai lea tulaga pe faamaonia pe leai”. Faaalia e se molimau o le toalua o le tina na muamua maua i siama, ma avea ai ma faitotoa na aafia ai le tina.
Ona o tulaga ma’ale’ale o le gasegase ua lē mafai ai ona faailoaina suafa o le ulugalii ma le nuu o loo mau ai. Ae i se sailiiliga na faia na iloa ai sa matuā malupuipuia le vaaia o le saogalemu o le vaega o loo fananau ai tina ma’itaga i le falemai autū o le atunuu, ina ua taofia le tina o loo faatatau i ai lenei lipoti ina ua lata ina fanau i lana pepe lona lua talu ona aafia i le gasegase.
O se molimau faatuatuaina na ia ta’ua sa matuā malupuipuia foi le nofoaga o le falemai sa faatino ai togafitiga uma mo le faafanauina o le tina. Na mafua ona tāpā se faamatalaga e faatatau i lea galuega tāua faafomai, ona o atugaluga ua faaleo ua fesiligia ai pe sa tatau ona faailoa mo le silafia uma e gasegase tau tina ma tamaitai sa taofia i lea taimi, le tina ma’itaga ma ona aafiaga o le HIV/AIDS.
E lei manuia sailiga mo se faamatalaga mai le vaega e faapitoa i lenei gasegase i le ofisa autū o le soifua maloloina i Motootua ona sa faapea mai se alii ofisa, o loo malaga i laua e nafa ma polokalame o le puipuiga o le faamai i se fonotaga i Niu Sila.
O le mafuaaga lea na tāpā ai se faamatalaga mai le Faalapotopotoga o le Samoa AIDS Foundation, ma faailoa mai ai foi o loo malaga i Niu Sila i se fonotaga tāua le alii o loo vaaia ma faauluulu i ai le ofisa o le faalapotopotoga.
I faamaumauga o iai nei, e to’a 22 tagata i Samoa ua maua i le gasegase talu mai le tausaga e 1996 na uluai aafia ai se tagata o le atunuu i le faamai oti. I lea aofaiga e to’a 9 ua maliliu ae to’a 13 o loo soifua pea, ma o loo faia i ai togafitiga e pei o le inuina o fualaau e faatelegese ai le ola o siama o le gasegase.
O le tausaga na tea nei e pei ona faaalia e le faalapotopotoga o le Samoa AIDS Foundation na faaopoopo ai le numera o tagata Samoa ua aafia i le faamai oti.
