I le taumafanafana o le tausaga nei, o taimi ia e tele ina vaaia ai le tulai o taamilosaga Kirikiti i nisi o faalapotopotoga e pei o le “Mau a Pule ma Tumua” o nisi foi o ia taamilosaga ua siitia atu ma faaaogāina nisi malae ona o loo faaauauina galuega i le toe faaleleia o le nofoaga o loo tele ina faaaogāina i taamilosaga i tausaga taitasi.
E matagofie se vaaiga i le tulaga o loo faagasolo ai le “Mau a Pule ma Tumua” Point England Park, Glen Innes ona o se malae tulata i le sami toe malu manaia i le savili agai mai i le sami, o loo siomia foi e laau tetele e mapu i ai Au i lona paolo ma le malu i le mu tinitini o le la. Sa vaaia le lava saunia o le “Mau a Pule ma Tumua” i sauniuniga o lenei taamilosaga i tulaga vaaia i le sologa lelei o taaloga, faapea foi le matagofie o togiga e ‘au taitasi o loo tausinio ai i lea taamilosaga ae lē gata i lea o le tapuaiga tele o Au o loo auai ai i lenei taamilosaga.
O loo faaauauina pea lenei taamilosaga i le vaiaso fou i le Aso Toonai, ma e faamoemoe e ono maua i le vaiaso fou le tulaga mataina o lenei taamilosaga mo le silafia. O loo faaalia le agaga faafetai o Poni Fonoti i le tulaga o loo tapena mai ai ‘Au taitasi o le taamilosaga aemaise ai lava le tulaga maopoopo o loo molimauina i le malae i taimi o taaloga ma feiloaiga a komiti o le taamilosaga.
O loo tatala foi le avanoa mo i latou o loo fia maimoaina ia taaloga i le faaiuga o le vaiaso.
