Ua teena e le faamasinoga o talosaga apili a le atunuu, le talosaga a matai o Tanugamanono ua avea ma sui o alii ma faipule i le faamasinoga na tagi ai le aiga o Afu Fauimuina Tutuila e totogi atu le taui o a latou meatotino na faaleagaina i se finagalo o alii ma faipule.
O le apili a le itu tagi sa talosagaina ai le faamasinoga o talosaga toe iloilo le court of appeal faasaga i le faaiuga a le faamasinoga maualuga na faamaonia ai o le iuga a matai na mafua ai ona faaleagaina fale ma meatotino e pei o fale ma faataoto mai ai le taui tupe e totogi e matai o le nuu sa faasaga i ai le talosaga.
O le faaiuga a le faamasinoga maualuga na faatonuina ai le totogi atu o le $960, 000, peitai ua faaitiitia lea aofaiga ina ua talia e le faamasinoga o talosaga apili le isi vaega o le apili a matai faasaga i le taui o mafatiaga o le aiga e $150,000 poo punity damages. O lea ua faaitiitia ile $50,000 ae aveesea le $100,000.
O lona uiga o loo tumau lava le faaiuga a le faamasinoga maualuga e totogi le taui o mea na faaleagaina i le aofaiga ua faatulagaa mai e le faamasinoga o talosaga apili e $863,710.00. Ua faaopoopo iai ma le totogi o le faamasinoga mo le itu a le aiga o Afu Faumuina e $50,000. O se tasi lenei o mataupu e pei ona silafia e le au faitau ua ioe ai le faamasinoga e totogi se taui oni meatotino a se aiga sa faatamaia ma faaleagaina ona o se iuga na faia e matai ose nuu.
O le tagi lenei a le aiga o Afu na faasaga i matai o Tanugamanono e aofia ai, Tuuamaalii Peni Punitia, Tupuola Afa Lesa, Anauli Pofitu Fesili, Fetaaoai Vao Samau, Upuse Tanielu Lepolu, Sinava Lima, Papalii Louis Tafunai, Papalii Tuvale Atoa, Papalii Ionatana Pula, Palaialii Gene Taatasi, Palaialii Pauesi Te’o, Asotasi Vaa Falealili, Tai Elise Solo, Galuvaa Sagauga Metuli, Tuua Fasi Leota, ma Tuuamaalii Siataga Mann.
Na maua se avanoa e tapa ai ni finagalo nisi o le aiga e tusa o le faaiuga ua taoto ai nei le mataupu. Na faaalia e le tina o Afu Faumuina Tutuila
“E muamua ona faafoi le viiga ma le faafetai i le Atua o le ona i tatou ma o ia foi o le faitotoa o le amiotonu tatou te ulufale atu iai lea ua mafua ai le aso. Ua faataunuuina ma le manuia le faiva sa sii ao ma po e ui lava sa lē maua se nofo lelei ma se malolo ae sa taula lava le faamoemoe i le Atua lea ua tali mai.”
“Faafetai i mātua, uso ma taitoalua faapea le tuagane faifeau Rev Fereti Tutuila ona o le tulai mai i taimi o faafitauli ma le fesouaina o le mafaufau; tainane le soosoo tauau mai o si o‘u toalua i taimi o mafatiaga ma le lē lava o le faasoa. Faafetai foi i nisi o le mamalu o le atunuu; aiga, uo ma ē masani sa latou tauave faatasi ma i matou lo matou mafatiaga, faamalo le fai tatalo”.
“Faamalo i Afioga i Faamasino sa nafa ma lenei mataupu ua mafai ai ona tauala mai ai le finagalo amiotonu o le Atua auā so matou nofo filemu ma ua manino ai mea uma auā e tele tagata sa tuu fesili a o lenei ua taunuu le tali manuia. Faafetai i le matou loia Afioga ia Luatuanuu Toailoa Solomona mo le tauaveina o le matou mataupu. Ia alofa le Atua ma faasusulu atu le malamalama ina ia faamutaina ai le lē amiotonu sa faia”.
O le finagalo foi o lona toalua le susuga Papalii Francis Fepuleai na ia ta‘ua ai “Talitonu o lea ua tali faaaliali mai le amiotonu o le Atua ma o se fiafiaga lea mo le matou aiga. E ui lava ina umi ma tele ni taumafaiga sa taumafai ai nisi e faanenefu tulaga o lenei faamasinoga ae o lea ua tali mai ma e faafetaia ai le agalelei o le Atua.”
“O le mea sili ia malamalama le tele o tagata auā o le vaai mai i lenei aiga o se aiga faatautee i le nuu ma le ekalesia ae leai o loo fai lava lo matou aia tatau ma finau i le mea moni lea ua faamanino le tele o mea auā e leai ma se mea e ono sala ai lo matou aiga.
Ua tele taimi maimau ma mea ua maimau ae leai se sala a lenei aiga ua faamaonia talu lava le naunau e fai le mea sese ae pupuni le mea sao”.
