O le vaiaso lenei ua amata ai ona faagasolo le faainuga o fualaau o le mūmū tutupa.
Ua silia i le tolu masina o fautuaina pea le atunuu ina ia inu tagata uma i nei fualaau ona o le toe vaaia o le mamalu o le atunuu ua agai atu i falemai ona o le aafia i siama o le namu lea ua maua ai ma le anufe e taa i le tino o le tagata ma maua ai loa i le gasegase o le mūmū tutupa. O le gasegase lenei na ta‘ua e Ualesi Silva, o le tamaitai o loo faauluulu i ai galuega faalauiloa a le Matagaluega o le Soifua Maloloina e ta‘ua o le gasegase tuai, ma e lē tatau ona toe vaaia i le lalolagi, peitai o le lē mae‘a lava o togafitiga o tagata uma e tulai mai ai pea lea faafitauli.
O le faamalosi la lea ua ave e ala i faasalalauga e mo tagata uma o Samoa ma atunuu mamao e i Samoa i le faaiuga o le vaiaso lenei, e tatau lava ona inu nei fualaau.
O le vaiaso na tea nei sa taloina ai se fonotaga a le Matagaluega o le Soifua Maloloina ma faataatia ai loa le polokalame auā le faainuga o fualaau.
O sui o le Malo i tamaitai ia ua tuu i ai le galuega tele o lenei vaiaso ina ia mautinoa e tusi uma ma faamaumau suafa o tagata i totonu o aiga ma i latou ua inu fualaau.
O tagata e aofia i lea taumafaiga e lua tausaga le matutua agai i luga.
O tagata asiasi mai i fafo o loo i totonu o Samoa ua faamalosia foi le inu uma o ia fualaau pe afai o i Samoa i aso e lua ua atofaina mo lea faamoemoe.
O le mūmū tutupa lea e fulafula ai vaega o le tino, ona ua lē gasolo lelei le toto ma le vai o le tino talu ai le anufe lea e nofo i totoga o le tagata.
Ua faagasolo foi fautuaga ina ia faamamā tafatafā fale mai i vaivai e ono to‘a ai ma maua ai le namu lea e pepesi solo ai le mūmū i le tino o le tagata.
O le mafuaaga o le toe vaaia o le atunuu ua aafia i lenei gasegase na ta‘ua e le tamaitai ia Ualesi Silva, ona o tausaga uma o loo faagasolo ai inumaga nei o fualaau ua maua le toatele ua o latou lē usitaia foi lea taumafaiga ma ua lē inuina fualaau.
O le toatele lava ua toe aafia, o alii ma o i latou ia ua manatu le Soifua Maloloina e lei usitaia inumaga i tausaga ua tuanai ia la ua toe aafia ai i le mūmū tutupa.
O tina poo sui o malo o le a alu uma i ai le numera o fualaau e faainuina i le faaiuga o le vaiaso ma o i latou ia ua ave i ai le faamoemoega o le Matagaluega o le a faamaoni ona faatino lenei taumafaiga ma ua aofia ai i le latou galuega le vaavaai lelei lava seia mae‘a ona inu uma fualaau a aiga taitasi ona faato‘ā o ese lea.
