Na feagai le kolisi maualuga o Aranui i Kalaiesetete ma le latou sailiga tupe e ala i mea taumafa felanulanuai faa-Pasefika sa faatauina lava i totonu o le hall a le aoga i le afiafi o le Aso Lulu, 13 Iulai 2011.
O le faamoemoe e saili seleni mo le malaga a le kolisi o loo fuafuaina mo Samoa i le tausaga fou. Peitai na valaaulia faapitoa ai ma alo Samoa lauiloa nei o le atunuu, Laughing Samoans e pei ona faaigoaina ai alii fai ata malie o Eteuati ma Tofiga e faafiafia ai i lea lava afiafi.
O se avanoa maua gata tele le auai mai o le Laughing Samoans e pei ona faaalia e le tamaitai faiaoga, Sia Batcheler, ae o se fiafiaga na momoo i ai loto o le fanau aoga, faiaoga aemaise le community ina ua mautinoa a latou malo faapitoa o lea afiafi.
O tapenaga o taumafa eseese faa-Pasefika na saunia e mātua ua faapena ona felanulanuai ai feleiva ma ua taumasuasua faatau aemaise le lagolago a le mamalu o le atunuu na auai. Na maitauina foi le taugofie o le ulufale, e pule lava le tagata i lana faitalia e ala i lana foai. Sa saunia foi e le fanau faafiafiaga a o lei amatalia le ata autū.
O le uluai show a Ete ma Tofiga sa amata i le 4pm ma faafiafia ai mo nisi ua lē mafai ona auai i le afiafi i le 6pm lea na faamatala fiafia e le pule o le kolisi a o tau soloi ona fofoga fai mai ua fiu e ‘ata.
O se taimi muamua lea ua ia feiloai sootaga tagata ai ma nei alii. Peitai e amata ane le faafiafiaga tele ua lē ofi le hall i le au matutua, fanau aoga ma tupulaga aemaise nai fanau laiti. Toatele foi uso Maori ma palagi na taliē faatasi ai pe a tuu a‘e nei i luga le tuiga o Aunty Tala. Na maua se faatalanoaga a le sui o le nusipepa ma nei alo o Samoa, ma ta‘ua ai lo la fiafia tele e auai.”
E lē o laua o ni fomai poo ni saienitisi ae o se taleni ua la maua, e tau ina ia aogā e aumai ai se ‘ata ae o se fiafiaga foi e tau faagalo ai nisi mafatiaga faamafui‘e e pei ona ōia ai nai pitonuu i Sasae o loo toatele le atunuu e alaala ai”. Na faaalia o la lagona mafatia i le tulaga ua iai le aai, ae sa lē natia foi lo la matafefefe e nonofo umi ina ua la faalogoina se isi tamai luluga a o iai i totonu o le aoga.
O le la show lea e tasi le itula atoa sa faafiafia ai leai se malologa, ae o se itula pito sili ona faagalo gata i le aumaimoa, e taliē mai lava i le amataga e oo i le faaiuga. Na faaiuina lea po fiafia i le tutulai o ē na faatumulia i le hall e patipatia ma faafetaia le taleni faafiafia loto e ala i nei alo o le atunuu. E avatu ai foi le faamalo i faiaoga o le Kolisi Aranui aemaise Taufao Leota, Sia.
