Tatala le CD Nu.3 a Tama o le Pisaga

I le faaiuga o le vaiaso na tea nei, na tatala aloaia ai le CD Volume 3 a nei tamafanau a le atunuu i Sini nei, ua lautogia i le taleni faamusika. Ua faaigoaina le CD, o le “Tulai ma Loimata”, ma sa tuufaatasia e Taufue Laulu Toelupe ma Atofu poo King Faipopo, e pei ona lausilafia ai o ia.

O alii pepese nei mai Vailoa Aleipata ma Malie. E 13 pese o loo iai i totonu, o le CD. O le fale puepese o le JJ Recordings, a Faatasi Sanerivi ma lona faletua ia Irene Tai‘ivao Milford, na faatinoina ai le galuega.

E pei ona masani ai Samoa, soo se faamoemoe, e tatau lava ona faamuamua faafetai i le Atua, lea na nafa ma Pastor Fuimaono Pama A.O.G. Na fofogaina le po, e le afioga i le Faatonu o le Leitio, Siuleo o le Samoa na Galo, Tagaloa Seiuli Faleao Autagavaia Vaai.
Na maualuga foi lenei faamoemoe, ona sa auai faapitoa le SBS TV e pueina le taumafaiga, ma o se laasaga poo se avanoa lē aumaua. Na lagolagosua foi i lea po nisi o alo faimusika o le atunuu, e pei o Lealai Sone Mariner, Matulino Ene Lagaaia ma Filipo Taaititi le siamupini o tauvaga a le Golden Oldies, lea na faatautaia e le Fono Aoao a Samoa i Sini i le 2009.

O le faili lauiloa a le United na alo atu i le faafiafiaina o le atunuu, a o toe faaiila lelei taleni siva a nai isi tamā ma tina matutua, na fia maimoaina lenei taumafaiga.

I se faatalatalanoaga ma nei alii pepese, na la ta‘ua ai le laua faamoemoe e pueina se DVD i se taimi lata mai.

E faapea foi ona la molimoliina atu le agaga faafetai tele i le mamalu lasilasi o le atunuu, ona o le opogiina o a laua moemitiga, lea ua tino mai ai le CD Numera 3, “Tulai ma Loimata”.