O le Afioga i le Palemia, Susuga Tuilaepa Lupesoliai Dr. Sailele Malielegaoi na saunoa i le saunoaga autu o le faamanatuina o le Aso Faapitoa mo Pisikoa i le lalolagi atoa, faapea ma Samoa nei.
“Faafetai i la outou tautua i totonu o Samoa nei.”
Na saunoa Tuilaepa i le tāua o le galuega o loo faatinoina e i latou ia, i le ofoina mai o le latou tautua mo Samoa.
O le galuega lea a i latou ua ta‘ua o pisikoa poo i latou ia ua ofoina fua mai le latou soifua e tautua ai i soo se atunuu o le lalolagi.
E le gata i lea, a o nisi o atunuu o le Pasefika lea ua oo lava ia Samoa, lea ua toatele i latou ua malaga mai ma tautua e aunoa ma se totogi.
“O lenei aso e tasi ua faatāua ai le galuega a i latou nei, tatou te manatunatu ai i le latou sao, aemaise o le latou tomai faasoa i o tatou tagata.”
Na saunoa le Afioga i le Palemia, i le toatele o nisi o i latou o loo galulue i nisi o vaega o le lalolagi, e maliliu ona o le galuega lava lenei ona o nisi o faama‘i e tutupu ai.
Na avea ai foi lea aso faapitoa ma avanoa e manatunatu ai mo i latou sa tautua ma avea foi i latou ma pisikoa i tausaga ua alu, ae ua fai i lagi le latou folauga.
O galuega tāua ma le aogā a i latou na fai mo Samoa, e pei ona saunoa Tuilaepa e tele nisi o faalapotopotoga tuma‘oti aemaise o nisi o vaega o le atunuu, na mafai ona tautua ai pisikoa, i le faasoa lea o le latou tomai i itu tau i galuega.
E le gata i lea, ae o totonu o aoga i nuu ma afioaga i tua, o loo galulue ai nisi o i latou ia, auā le unaia ma siitia atili o tulaga tau aoaoga a alo ma fanau a le atunuu.
I le umi ai o le osiga feagaiga o le Malo o Samoa ma nisi o Malo, auā le auina mai o pisikoa e ofoina fua le latou tautua mo Samoa, na faamauina ai le faafetai a le Afioga i le Palemia i le Malo o Amerika, Iapani, Ausetalia, Niu Sila aemaise o le Malo Aufaatasi.
Na faafetaia foi le sao a i latou ia, i le Fonotaga Lona Tolu a Atu Motu Tauatiae (SIDS) lea na talimalo ai Samoa i le masina o Setema o le tausaga lenei.
I le faamanatu ai o le aso mo Pisikoa uma i totonu o le atunuu, na faatautaia ai se savali tele, mai le Ofisa o Leoleo seia paia luma maota o le Malo.
Na mae‘a le tulai faaaloalo mo le sisiina o le tagavai a le atunuu, ma agai ai loa le mamalu o pisikoa aemaise o le atunuu na mafai ona auai i lea sauniga, auā le faatautaia o le polokalame atoa o le aso, na faatautaia i le Falesamoa a le Pulega o Tagata Maimoa mai Atunuu i Fafo (STA).
