Faafetai mo le maliu o Falana‘ipupu Sola Mefiposeta Maea Tele‘a

O le a muamua ia ona ou taia le seuga ma ou faapoipoi ai le vaiula, e pei o le fetalaiga nai le fale punaoa, ae mapu ane ia i niafane ae lafo le taula i malolo, e pei o le fetalaiga nai i le Manu‘a a le Sagalala.
Auā o lea ua i le manu e pei o le suafa o le fanua o Tuiatua Tupuiavao ae tofa i le taume Leiataua le sa o Leluaipou o malo. I paia o Samoa mai saua sei paia le fafa o saoalii, ma le tapuaiga o taua. Faapea foi paia faale-Ekalesia ma paia faalemalo. Ae ua see lilia nei ulufanuasesee auā o lea o loo taoto Saveasiuleo i le Alititai.
Ae avea ia lenei avanoa tāua matou te molimoli atu ai la matou faafetai auā le aso ma le taeao na pogisa ai le afioaga a le Tuiatua Mataafa i Amaile ma le agapapa e susu ai Tauiliili ma lona uso alii tamapaa ma alotutusa o le Mataafa a o se laoa fetalai foi o Fonoti ma le aualuma.
Ae tainane foi le maota i faleulu e afio ai Tuiavii ma lona uso alii, a o se alalafaga o Valai ma le faleulu ma upu ia Saleaumua o loo tu‘i mulipapaga i le sa‘o o le aiga le afioga ia Maeataanoa,  poo le paia foi lea i alalamalae ma i laua matua le alii o le itu ma le tane o le itu ma upu ia te oe Saleaumua.
Ae tainane foi le paia o le taulagi ma satuala e afio ai Tofa ma le aiga sa Tofa – tainane le paia i le fale fitu ma upu i le Salemuliaga. Tulou tulou tulouna lava.  Ae avea ia lenei avanoa filemu e tau molimoli atu la matou faafetai faalelava i lau susuga i le toeaina Setefano Leiite ma le tina o le galuega le faletua ia Lealofi faapea le susuga i le fofoga o le Ekalesia poo le tootoo o Saleaumua ia Talamalie Tafua Seuala vaeane ou tafaipaia, i le paia o le laulau a fono.
Ae tainane aiga o tupu ma aiga o nofo, ma aiga o papa ma aiga o falealii, ma aiga tafaifa, ae lē gata i lea o le usoga ia Tumua ma Pule, ma le usoga o faleupolu ma le nofo matafale o le Ekalesia PIPC i Tamaki.
Faafetai i lo outou alofa ma le agalelei e ala i le malo ma le toga paia, e ala i tupe ma teufugalaau ae lē gata i lea o faamafanafanaga ma viiga o le Atua. Ua malie le tausuluga a Malietoa nai i le motu, ua malie foi le faalelegafulu aitu o Salevao ua malie le tou faaaloalo. Ua pa‘i mai ua pa‘i ifo lo outou agalelei auā le tuumalo o lo matou Tamā ia  Falana‘ipupu Sola Mefiposeta Maea Tele‘a.
Faafetai, faafetai tele lo outou agalelei, ae o le a lē galo foi afi‘a i si ona vao i o matou aiga i paolo ma gafa e malu ai Falana‘ipupu Sola ma Tina ma lenei aiga faapea le nofoāalo.
Ua outou ma‘au ua outou milosia ua outou  gapatia aua le tuumalo o lo matou Tama poo le na pele i lenei aiga.  O a matou toe upu mulimuli, O le mavaega Tavita ma Ionatana o au upu ma a‘u upu o le a lē galo, o a‘u tala foi ma au tala o le a tumau e oo i le faavavau.
Soifua sainia lenei faasilasilaga faanoanoa e: Tuiatua Mataafa Tupuola Lui, Matautia Theresa Schuster, Tauiliili Lefau Harry Schuster, Maeataanoa Ieremia, Sola Filemoni Maea, Tofa Falaoa, Tupa‘i Peni Tupu, faapea le tina faanoanoa ia Tina Maea Tele‘a ma le fanau.