Na amata mai lava i le masina o Iuni ona faamamafaina le faatāuaina o le Matariki i totonu o le siosiomaga o Aotearoa i aiga Maori, o aoga, o faalapotopotoga ma fale faigaluega foi seia oo mai lava ina faaiuina i le tele o ni auala na faamanatuina ai.
O le vaiaso mulimuli la o le tuuga ua tali mavae atu nei na matuā tapena ai lava aoga amata a le faalapotopotoga a le Kids Count Limited ma faapena ona faaiuina ai galuega o le tuuaga faatasi ai ma le faamanatuina o le tāua o le vaitau o le Matariki mo tagata Maori lava. E tolu lala o lenei kamupani mo aoga amata ma e eseese lava metotia ma auala na mafai ona faatinoina ai e nei aoga amata le faatāuaina o le Matariki.
O le faaaogāina o le gagana (te reo Maori) o le a‘oa‘oina e ala i polokalame o fetu e fitu ma o latou uiga ma aoga, aemaise foi o le faalauteleina o le uiga o le Matariki mo fanau i totonu o lenei piriota faalea‘oa‘oga ua uma atu.
O le vaiaso la ua mavae atu nei na faia ai ni faatasiga ma ni mafutaga a mātua ma fanau o nei aoga amata i totonu o a latou faleaoga.Na matuā latou patipatia ai le aulia manuia o faagasologa o polokalame o le Matariki, aemaise o lea ua faaiu foi ma le manuia lenei vaitau o le Matariki mo tagata Maori i lenei foi tausaga.
O ni vaaiga matagofie ma le mafana i mafutaga faalea‘oa‘oga auā na matuā faatino foi le gaosiga o le hangi (umu), o tu ma aga faaleaganuu a Maori, aemaise ai o le faaaogāina o nisi auaunaga na mafai ona faalauteleina ai atili le iloa e le fanau laiti o le Matariki.
I nei mafutaga, sa vaaia foi ma faalogoina ai le maofa o nisi mātua talavou, o fanau ua i aoga tulagalua ma nisi lava foi o tagata Maori sa mafai ona auai mai i nei mafutaga tāua, auā o le mea moni foi lava, faato‘ā mafai ona maua e nisi tamaiti lenei avanoa tāua i totonu o nofoaga faalea‘oa‘oga so latou iloa ma se sootaga ma le faatāuaina ma le faamanatuina o le Matariki.
Ua mae‘a nei la le malologa faalekuata a fanau aoga a ua faafiafiaina foi nisi o fanau ma mātua ona o lenei avanoa tāua na maua na mafai ai ona toe asiasi i totonu o aoga amata sa faavae mai ai o latou olaga faalea‘oa‘oga.
