E lua togiga ua olioli ai nei alo ma fanau o loo aoaoina i le Aoga Tulagalua poo le Primary School a le afioaga o Salani i Falealili.
O le togiga lanu moana ua faapitoa mo taimi e aooga ai i totonu o potu aoga, a o le togi lanu mūmū, ua faapitoa mo taimi o taaloga poo ofu taalo.
E tusa o se faamatalaga na tuuina mai, o le seleni atoa na alu i le faatauina o togiga uma e lua, e tusa ma le $5,786 tala.
O mitiafu faikola e 50 na faatau mai Inala i Brisbane i Ausetalia, e tusa ma le $1,800 tala Ausetalia, lea na faatau mai e le tofa ia Toso Lavetala ma le tausi ia Vai.
A o mitiafu papa‘e e 50 na faatau lava i Niu Sila e tusa a le $1,100 tala le tupe na alu ai. O ta‘aiga ie lanu moana ma ta‘aiga ie lanu mūmū na alu ai le $2,000 tala, ma le ta‘aiga pine mo mitiafu na alu ai le $886 tala.
E lē o toe taugofie mea i nei aso, aemaise le sailiga o le seleni, peitai o se tasi lava o aiga o le afioaga, ua aumau i Niu Sila nei, le Afioga Fuimaono Pati Faaiuaso ma Manusina Luāpua Faalaa Faaiuaso ma le aiga, na latou fiafia e faatino lenei foai tāua mo nai fanau o le afioaga, e pei ona saunia ai lenei togiga.
O le Samoa lava ia na soifua a‘e ma lona agaga Samoa moni, e lē mafai ona motusia le faanaunauga lea e toe fia foi lava se‘i molimoli sina mea, pe itiiti pe telē, ae tau a o se mea e faamaonia ai le faaupuga masani, ‘o le Samoa e loto alofa, e tausi matua, e tausi aiga, e tausi fanau, e tausi afioaga foi.
Na momoli le faafetai tele a le alii pule ma le aiga faiaoga i le aiga o le Afioga Fuimaono, e tusa ai o lenei foai tautele mo alo ma fanau o Salani i Falealili.
Faamatalaga na tuuina mai
