Faaeva le ipu o le lalolagi i Kalaiesetete, ae sola le Samoa ma le manumalo

E lei mafaia e le malosi o puao ma le ea mālūlū o Kalaiesetete ona taofia le lolofi atu o tagata i le fia maimoaina o le taunuu mai o le evaevaga a le ipu o le lalolagi i le taaloga lakapi (Webb Ellis World Cup) i le taeao segisegi o le Aso Tofi, aso 20 o Me, 2010 i le Arts Centre i laufanua o Kalaiesetete. Na faapena foi ona matuā sasala le manogi o fugalaau mātala puaina mai e le sau mālū o lena lava taeao.
E tusa ai ma polokalame faagasolo a le TVONE i luga o ana faasalalauga i le polokalame o le “mālū o le taeao”, o le faasavali lea o le ipu se‘i maimoa foi pitonuu uma o Niu Sila, talu ai o le a talimalo le atunuu mo le faagatama lakapi i le tausaga fou.
O lea foi polokalame ua faavasegaina e auina tuusa‘o atu mai lea vaega o le atunuu e le alii o loo faasalalauina le tala o le tau (Tamati), ua iai foi ma aiaiga e faimeaalofa le TVNZ i soo se tagata e manaia sona laei ma teuga faalakapi a soo se atunuu e auai i le taamilosaga o le lalolagi, e lē lavea ai Niu Sila, aemaise o le faailoga manumalo maoa‘e o le maua o avanoa fua e maimoa ai soo se taaloga e faia i lou lava itumalo.
O le taeao o le Aso Tofi na oo mai ai le tafaoga a le ipu lauiloa i Kalaiesetete ma sa faatumulia le nofoaga o le Arts Centre i fanau a‘oga laiti, o kolisi eseese, o soo se tagata lē faatapulaaina le matua, o le vasega o tusitala ma le aufaasalalau, e oo lava i tina ma a latou pepe, o se vaaiga matalasi lea taeao ma sa faatasi ai foi le alii pulenuu o le Christchurch City Council, Hon Bob Parker.
Na maitauina e le tusitala le usupo atu o le faletua o Lynne Marie Ariki ma lona alo tamaitai o Annabell i lea taeao, ae na matuā faate‘ia i le toe emo ane o le ata ua uma ona suia mai ona laei i ofu agaifanua a le atunuu o Fiti. E maeu le matagofie o ana teuga ae o lenei tamaitai tauagafau o le tamafanau a si o tatou atunuu.
E toatele nisi tagata sa laeiina togiga a isi atunuu o le lalolagi, ae ina ua faia le faaiuga a le faamasino o le TVNZ na manumalo ai le faletua o Lynne, e pei ona maimoaina i luga o le televise.
Ua pei o ni ufi e tutupu o ta tino i lo ta fiafia aemaise ai le maua o le avanoa o le tusitala e ta ai le patē.
Na lē maugagana le faletua o Lynne ina ua ia maua le faailoga manumalo, ae o le mea mautinoa ua alagatatau lava talu ai na faalauiloa mai e Tamati ma le TVNZ, na muamua taunuu le faletua i le nofoaga nai lo latou i le 5am.
Na iloga le pisapisaō o lea taeao i haka a le Shelley Boys High, o faafiafiaga a nisi o kolisi sa auai aemaise le tautulei solo e fia oo, fia pa‘i i le ipu auro.
O le tulafono e taga le sōsō i ai ae matuā faasāina le pa‘i, ae ou te faafetai i le pulenuu o Bob Parker na maua ai lo‘u avanoa se‘i o‘u pa‘i tasi ai a‘u i le ipu.
Ae talosia ia le alo atu o si a tatou ‘au tele faavaomalo, afai ua lē maua le Supa 14, taumafai ane i le ipu tele lea ua oo mai i laufanua, ma avatu ai le faamalo a le tatou nusipepa i le faletua o Lynne mo lona manumalo ona o le sogasogā i mea lelei.