O le lagalaga maa e tupu ai le ‘ai o mata e loata e pei o lena foi tala masani a tamaiti o le malo pipo.
E lei popole tele le Numera tasi a Ausetalia i le fusu (Boxing) le alii o Elise Alex Le‘apai i folafolaga a le alii taulu‘ilu‘i o Big Bob Mirovic lea na ia fia lu‘iina ai le fusi o le WBO Oriental Heavyweight o loo numera tasi ai Alex i Ausetalia.
E ese a le taga araisa ese le fasi povi masima. E ese a le koleni faasoloatoa o le tama pa‘epa‘e, ese le maaa o maso o le tama o le Manu.
Na pei e feemo ni uila malolosi ma tauāu ai ina matapogia si alii o Big Bob Mirovic ina ua ta‘u i ai e Alex le eseesega o tama fusu i nei ona po.
E lei iai a se umi na o le tasi le taamilosaga e 2 minute ma sekone e 57 sa faatatope ai e Alex si alii na ia fia lu‘iina lana fusi, ae totolo loa ma fa‘alo mai ua pogisa le lalolagi ua ia oo i ai.
Na mataina lea taaloga auā e lei taitai ona tau le ata ae oti le tama o le ata e pei foi ona maimoa i ai le toatele i luga o le Foxtel ma ē sa maimoaina le taaloga i lea po.
Ua toe faamafanafana nei lava le fusi a Alex ia i lona maota ma faatali foi se isi e toe fia lu‘iina o ia. O le agaga faafetai tele ma le faamalo a le susuga ia Alex ma le aiga atoa e tusa ai ma le tapuaiga a Samoa i soo se tafa o lenei lalolagi, ua a‘e manuia ai lona taumafai.
“E lē faigofie pe ana leai a outou talosaga.” Na faafetaia faapitoa e Alex si ona tina ia Leitu Le‘apai sa malaga mamao mai Samoa e tapuaia lana taaloga aemaise si ona tuaa ia Faatau‘i ua le mafai ona auai mai ona o tuatuagia.
O le isi foi alii logologā i le fusu sa ia faalauaitele ana folafolaga, e leai se isi na te faavaivaia lona paoa i le taimi nei, e oo foi i le heavyweight, peitai o le po lava lea o le Aso Tofi 29 o Aperila sa fusu ai Alex ma Big Bob Mirovic na faaailoa ai e Alex ua lelei o le a ia tali atu i le valaau ua tuuina mai, ae na o le tasi a le taamilosaga na te tatopeina ai si alii lea o Danny Green e pei ona maimoaina.
O le faafetai faapitoa a Alex Le‘apai i le uso fusu ia Toaletai David Tua, o ia sa ia tata‘i ma āsaina le auala e mulimuli ai tupulaga Samoa, o le luitau foi lea i lona olaga fia taumafai e faaaogā le taleni ua aumai e le Atua ia te ia ma sisi ai pea le tagavai a Samoa. O le mau tauave a Alex ina ia pa‘ū se toa ae tulai atu foi se isi toa.
O ia o se alii e fiafia tele i le lakapi peitai e iai tulaga e lē fiafia ai ona e le tutusa uma tagata, o lea na toe sui ai lana taleni ua agai atu i le fusu auā e tele foi se avanoa na tatalaina mai e le Atua ia te ia i lea foi taaloga, o le saunoaga lea a Alex Le‘apai e pei ona faatalanoaina ai e le sui o le Samoa Times.
O le susuga ia Elise Alex Le‘apai e pei ona lausilafia e mai i le alalafaga o Laulii i Samoa a o loo aumau pea i Brisbane. O nai ona matua o Faatau‘i ma Leitu Le‘apai, o ni tagata sitiseni o Ausetalia peitai ua aumau nei i Samoa ona o pisinisi ua atinaeina ai aiga e pei ona malaga atu ai i Samoa.
E iai le faamoemoe o le taumafai o le susuga ia Alex o loo fia avea ia ma siamupini o le lalolagi i lea lava taaloga o le fusu. Ia manuia lou alo atu mo lau taaloga i le lua masina o lumanai Alex Le‘apai.
