E iai le talitonuga o loo taufai tutusa uma i tatou i le manuia mai le Atua, i lona alofa ua mafua ai ona ae ai ma le manuia faiva ma galuega o lena foi vaiaso ua tuanai atu. Ae tumau pea le tatalo ina ia faapea ona aveaveai ana faamanuiaga mo i tatou i feau ma tiute o lenei foi vaiaso ua tatou savalia.
Talofa lava. O le faaauauina lenei o le talaaga o le soifua o le afioga ia Tuifaasisina Tofilau Karl Gatoloai, mai Iva, Lalomalava, Falelima i le motu i Salafai ma Satuimalufilufi i Upolu.
Ua e faitauina le vaega muamua o le soifua aoaoina, ae pei ona faailoa atu o le isi vaega o aoaoga, e te maua i le taimi na toe saili ai isi agavaa mo le faaauauina o faailoga ina ua mae‘a ona faauuina.
Ae o le taulimaina o faailoga e pei ona ta‘ua, e lei lava lea e mafai ai ona faatinoina tiute ma ona aiaiga masani. O le ala lea na toe finauina ai ma toe agai pea mo nisi aoaoga mulimuli ane.
O le tausaga lava lea e 2006, sa iai le naunautaiga ina ia faatino ai le faauuina mo lona taumafai. Peitai sa lē mafai ona faatino ona sa lē fetaui ma le faagasologa e pei ona faataoto ai fuafuaga a le iunivesite. Sa toe tuu ai ma toe tolopo le faauuga seia aulia le tausaga 2007, i le masina o Me. O se isi la lea tala faanoanoa i le soifuaga o le auauna ina ua lē tau lau o lona faamoemoe sa ia manao i ai.
E pei ona silafia o le susua o ituaiga aso faapea i le soifuaga nei, o le tuuina mai o se taui a o silasila atu i ai nai mātua, auā sa aiaiuli ma tapuaia le faamoemoe o le fanau mai tausaga e tele sa feagai ai. A o tapena ma agai atu le afioga ia Tuifaasisina mo lona faamoemoe, ae faafuasei ona maliu ma toesea lona tuaa, le afioga ia Aiolupotea i le amataga o le tausaga, a o loma ai le faauuga ia Me o le tausaga lava lea.
O Me o le 2007, sa faauuina ai i faailoga e lua sa faaeaina ai, ma amata ai loa isi aoaoga mo isi laasaga mo le faatinoina o manaoga faapitoa o le BCom ma le LLB. O le masina o Novema o le tausaga lava lea, na faataunuu ai ma pasia o le pa, i totonu o le fale faamasino o le Faamasinoga Maualauga i Aukilani.
O le mae‘a ai o le pasia o le pa, ona faaauau ai pea lea o isi vaega moomia i le galuega faaloia, ona o le naunautaiga ina ia mafai ona tauaveina tulaga uma e lua.
O le fautuaina o le tulafono ma lona faaaogāina e ala i tusitusiga i pepa ma faaupuga, aemaise ai o le mafai ona tulai i luma o le faamasinoga i le faatinoina ma le finauina o mataupu eseese (Barrister & Solicitor). O se tasi lea o vaega o le galuega faaloia, e le o mafai ona ausia e nisi, peitai ua mafai ona faamanuiaina ai ma tauave e le afioga ia Tuifaasisina.
