Ua tele tausaga talu ona tuumalo lona tuaa ia Lauofo Meti, ae o le faaiuga o le vaiaso lea na molimauina ai le tumutumu o le afioaga o Luatuanuu i le Aso Toonai na se‘i faatoa mavae atu nei, i se sauniga tāua ua faapea ona faaee atu ai le suafa Lauofo o le afioaga o Luatuanuu ma le Itumalo o le Anoamaa i le afioga i le Sui Palemia, le Tofa Fonotoe Nuafesili Pierre Lauofo.
O le tuaa o le Sui Palemia poo lona tamā, le Tofa Lauofo Meti, sa mulimuli lava seei i le suafa, lea na avanoa ai loa le suafa mo se taimi ina ua tuumalo, ma oo ai le mataupu i Foga a le Malo poo le Faamasinoga o Fanua ma Suafa.
Ua tele faamasinoga e saili ai poo ai tonu ua talafeagai e seei i le suafa o lona aiga ma e oo lava i le taimi o le saofai faatoa mae‘a ona faamanino se taofiga na faia e nisi o suli o lea lava aiga ma faasalalau i luga o le televise ina ia aua ne‘i amanaia le tulai mai ai o le Sui Palemia e umia lea suafa.
O le tali a le Afioga Fonotoe Pierre Lauofo o le oo atu i le televise TVONE ma le faaiuga o le faamasinoga mulimuli i lea mataupu ma faalauiloa ai loa lana saofai e faia i le faaiuga o le vaiaso, ina ua mae‘a ona laolao le mataupu i le Tulafono, lea ua avanoa ai loa ona faaee le suafa, ma nofoia i le tuanai o se taimi e lē o iai se tasi e tauaveina.
Na auai le Afioga i le Ao Mamalu o le tatou Malo, ona o le suafa Lauofo o le Amomua-a-le-Tui Atua e tusa o tootoo o lea suafa matai i talatuu ma tala tuufaasolo o tu ma aganuu faa-Samoa.
O le afioga i le faauluuluga o le Ekalesia Katoliko i Samoa, le afioga Moseniolo Alapati Mataeliga na faatautaia le sauniga o le misasa ma faapaia ai le nofo. Na matuā faatumuia le toatele o aiga na auai atu, aemaise o malo usu, ma sa auai atu foi le itumalo ma malo fai mai i lenei faatasiga, atoa ai sui o le Malo o uo mamae ma ē masani a le Sui Palemia ona o le fia molimauina o lea foi aso tāua. O molimau o lea faanofonofo na ta‘ua ai, e maeu le tele o le tamaoaiga sa maau i ai aiga uma faasino i le nofo fou, i le suafa Lauofo, ona e fai o tupe ae o ie o le malo poo toga, faapea palapalāmalo.
O le afioga Lauofo Meti le tuaa o le Sui Palemia, ua tele foi tausaga a o soifua na tautua ai i le malo e lē gata o se sui a Faipule o le Palemene ae o se Minisita foi mo le tele o tausaga ma o ona alo ua aofia ai le afioga i le Sui Palemia ma lē sa tulai mai i le tofi o le Komesina o Fefaatauaiga a Samoa i Niu Sila i tausaga ua mavae, Afioga Vaatu‘itu‘i Apete Meredith.
O le faafetai a le afioga Lauofo Fonotoe Pierre Lauofo ona o lea ua mae‘a ona faamanino lenei mataupu ma ua talosagaina foi le lagolago a le afioaga ma le itumalo i lea itu o le Anoamaa auā le pale mai ai i lenei suafa aemaise o le tulai mai ai pea o se sui o le itumalo i upufai o Malo.
O le faamanatu a le afioga Mataeliga, ia tulai mai i le avea ai o se taitai faaleaganuu e alofa i lona aiga, alofa i lona nuu, o lana lotu ma le itumalo aemaise foi le atunuu atoa i lona tofiga o le Sui Palemia.
E lē o maua se molimau faamaonia, poo le suafa lea o le a tauave e le Sui Palemia e tauva ai i le faigapalota tele a lo tatou atunuu i le tausaga fou.
