E faagalo gata galuega lelei i totonu o aiga, nuu, atunuu ma le Ekalesia. E lē iloa poo afea o le a mou ese atu ai lgona ma le mafaufau i lenei tina ma ona foliga lau fofoga fiafia i soo se taimi. O siuleo ia na lagona i fafo o le malumalu o le ekalesia EFKS i Otahuhu i le taeao o le Aso Toonai, a o lei amataina le sauniga mulimuli o toe sauniga faamavae o le faletua ia Faimai Tuimauga.
O le malumalu o le Ekalesia EFKS i Otahuhu na molimauina ai le toatele o le atunuu sa agai atu e fia feiloai ma fai tapuaiga faatasi ma le faletua ia Faimai a o lei tuua le olaga nei. O susuga i faafeagaia ma o latou faletua, o le Pulega EFKS i Auikilani i Saute sa faatasi uma ai, o le susuga i le faafeagaiga ia Lui Ponifasio ma lona faletua, o i laua o Faatonu o le Radio Samoa ma le nusipepa o le Samoa Times, sa tele foi sa latou mafutaga ma le faletua ia Faimai e tauala i ana tusitusiga ma polokalame mo Aoaoga.
Sa auai foi i le sauniga le afioga i le alii Faipule o le itumalo o Magele, le Tofa Su‘a William Sio, faapea le afioga i le Konesula Aoao o Samoa i Aukilani, Afioga Faolotoi Reupena Pogi, o uo ma ē masani, ae lē gata i lea o aiganalua sa latou auai uma i lea sauniga tāua.
Sa faapea foi ona auai nisi o sui o le ofisa o aoga sa latou mafuta mai, ona e lē mafai ona galo galuega lelei a lenei tina i totonu o le komuniti. O sui o tama ma teine tuai o le Kolisi o Samoa, le SCOPA sa lē tuua foi lo latou fia auai ona o lenei mafutaga ma le tina.
O le susuga ia Rev Tanielu Mamea o le toeaina o le pulega na ia taitaiina le sauniga, a o Rev Ata Milo o le tausi matagaluega o le ekalesia EFKS i Otahuhu na ia tauaveina atu le Sa o le faletua ia Faimai i totonu o le malumalu i le sauniga paia.
O molimau o lea aso, sa fai lea ma lui ma toe fagufagu mo i latou o loo soifua mai i le taimi nei, e pei ona saunoa i ai le susuga i le faafeagaiga ia Rev Ata Milo i le latou mafutaga ma le tina i totonu o le ekalesia. Na ia ta‘ua ai, o saunoaga a le tina e fai e taufaalili ae o loo sau ai le lui i totonu, o se mea e tatau ona fai.
O se tagata e finau, pe soli lava e Faimai ou vae e finau lava, e manatu lava ia e tonu lava ia i mea o loo manatu i ai, ae a nofo la ia ma mafaufau loloto i ai, o lui ia o le galuega o loo faafeagai ma latou o le aufaigaluega, e telē se aogā mo latou, ina ia aua ai ne‘i tautulemomoe ma fifilemu a ia mataala.
Ae o le saunoaga a le tamā ia Toleafoa, o se molimau mālie i le faafofoga a le atunuu, o se molimau a se tamā ua ia talia le oti o Faimai, ua tea ai le loto faanoanoa, ona ua ia toe faamatala uma ai uiga ma tala mālie a le tina a o soifua mai, ua ia mafaufau ai foi i le taimi o lea ia nofo toatasi ai, ina ia aua ne‘i ia soliina tala a Faimai aua ne‘i toe faia sona toalua. e o le saunoaga a le afioga i le alii Faipule ia Su‘a William Sio, na ia afea ai galuega lelei a Faimai sa fai mo le komuniti, o le lui a le faipule mo le atunuu, ua alu Faimai sa finau mo le komuniti a le Pasefika, ae o ai nei se isi o le ia tauaveina lenei galuega sa feagai ma le tina, auā ua ia iloa lelei e leai lava se isi e tutusa ma Faimai i le va ma aoga ma soo se mea e fai, ae faapea foi le Council; o lea na ia fesiligia ai lea poo ai se isi o lea ia faatumuina lea avanoa ma faaauauina lea galuega.
O se saunoga na matuā oo i loto o le atunuu ona o galuega lelei a lenei tina. Sa faapea foi ona molimau si ona uso matua ia Saluvale Pisu e uiga i le latou mafutaga ma si ona uso. O nisi o sui mai le ofisa o aoga, le susuga ia Eddie Tuiavii, Debra ma Lesieli Tongati‘o sa molimau i galuega a Faimai i totonu o aoga i le po o le Aso Tofi.
O le mae‘a ai o le sauniga i le malumalu ma auina atu loa lona Sa i le fanuatanu i Manukau mo ona toe sauniga mulimuli. O le susuga lava i le faafeagaiga ia Rev Ata Milo na ia faatinoina le sauniga i le fanuatanu ma lagomau ai loa i lona nofoaga tumau.
O loimata o le fanau i luga o lona pusa, na lagona ai le tele o le misia o le tina i totonu o le aiga, ae leai lava se tasi e fai loto, o le Atua na ia aumai o ia foi na te toe aveesea.
