O le aso 24 o Setema o le a suia ai le taimi i le toe vili faatelevave i luma o le vae o le uati ma tumau ai pea le muamua o Samoa i le itula e tasi e pei ona iai i le taimi nei pe a fua ia Niu Sila o loo tuai i le itula e tasi ae muamua i aso.
Ua faalele lagona lē fiafia o nisi ma faitioina le Malo i le suiga o le taimi ina ua mae’a le tausaga muamua talu ona faatino le suiga o le taimi poo le daylight saving. O nisi ua faitioina le suiga ua avea ma faaletonu ia latou tapenaga o le taeao i le vave feala o fanau e sauni i le aoga ae o loo pogisa e lei ao, o nisi foi ua fai mai ua mafua ona tuai i galuega ona o le suiga o le taimi.
Fai mai nisi faitioga e leai se eletise o mafai ona faasaoina i le suiga fou e pei ona pasia ai e le Palemene le tulafono e faatino ai. Peitai o le suesuega na faia e le Matagaluega o Leipa i le vaega o gafa ma le suiga o le taimi ua faaalia ai e se molimau faatuatuaina, le toatele o tagata na fesiligia e lagolagoina, ae peitai e vavalalata lava pasene o le aulagolago ma le autetee.
O i latou e fiafia i le suiga e fulisia i le aufaipisinisi lea e 52 pasene ae o tagata o loo tetee e i le va o le 40 ma le 48 pasene. “E manaia lava manatu o tagata na fesiligia e pei o lagona faaalia o le autetee ma mafuaaga e mafua ai, ae faapena foi i le aulagolago”.
O le finagalo o le molimau na maua mai ai le faamatalaga i le suesuega na faia, ae ua lē manao le molimau e faailoa lona suafa.
E tasi le afe tagata na fesiligia i le suesuega ina ua mae’a le suiga o le taimi i le tausaga ua mavae 2010, ma e fulisia i latou na fesiligia i le aufaipisinisi i Upolu faapea ma Savaii.
Na faaalia e le molimau e ui e tasi le afe i latou sa fesiligia, ae e na o le 484 na tuuina atu tali ma finagalo faaalia ae o le isi toatele e lei tali atu. O nisi o tagata lautele sa ave i ai fesili, e lē tele ni manatu na tuuina atu ae foliga finagalo o nisi e lē malamalama i le suiga o le taimi ma ona aafiaga ia latou fuafuaga.
O le vaiaso nei na faia ai le faaiuga a le Kapeneta lea na talia ai le lipoti mai lea suesuega e pei ona ave ai le faatonuga i le vaega o le Matagaluega o Leipa o gafa ma le suiga o le taimi ina ia amata loa ona faia faasalalauga faalauaitele mo le silafia e le atunuu.
Peitai na faaalia e le molimau o le a lē faia le suiga pe a ta le 12 i le vaeluaga o le po e pei ona sa iai i le amataga, ae o le a faato’ā ki le uati i le vaveao o le aso 24 o Setema mai le 3 i le 4 i le vaveao ae o le taimi foi lea o le a ki le uati i Niu Sila mai le 2 i le vaveao o le aso lava lea.
O se suiga o le a talafeagai lelei ma le sauni o Samoa e faatino le isi suiga fou, o le suiga lea o aso o le a tutusa ai aso ma Niu Sila.
O loo faitioina e le Tautua Samoa le faaauauina pea o le suiga o le taimi ona o loo latou lagolagoina faitioga ma mafuaaga mai nisi o le aufaipisinisi ma le atunuu.
Ae ua faaalia e le Matagaluega o Leipa o loo gafa ma le suiga o le taimi, ua faia le faaiuga a le kapeneta e tuuina atu i le Matagaluega o Aoga e faia e latou le toe fetuunaiga o itula e amata ai ma tuua aoga a le fanau pe a faatino le suiga o le taimi le Daylight Saving.
E atagia mai o le a amata aoga uma a le malo i le 9 i le taeao, ma o le a fetaui lelei ma le taimi e sauni ai fanau i le aoga, nai lo le tausaga ua mavae sa feala fanau ma sauni o loo pogisa e lei malamalama.
