O le lua vaiaso talu ai na oo mai ai se lipoti faapea sa iai se pasese a le Polynesian Blue na taunuu mai i se tasi o vaveao i le kuata e tea ai le 12 e lei iai nisi e faatalia atu le pasese i laulau masani e tau muamua mai i ai le pasese.
O le lipoti na taunuu mai na agai sa‘o nisi o le pasese, e lē o le pasese atoa, ua ao a latou ato ma faatautaia loa suesuega masani i le itu o le Tiute faapea ai le itu o le Kuarenitini poo le Fa‘asu.
E taunuu mai la le taavale ua aumai ai nisi o le aufaigaluega i le malaevaalele ma agai atu le aufaigaluega ua omai i fafo nisi o le pasese a lea vaalele.
Peitai ina ua tapa lē o loo faapea ona Sui Ofisa Sili Lagolago i le Ofisa o Femalagaaiga a le atunuu, ae ia ta‘ua ai e lē mafai ona tupu se tulaga faapea i le malae vaalele i Faleolo.
“E lē taitai tupu ni mea faapena i Faleolo,” o le faamatalaga lea a Togatalima Fouina Milford ina ua tapa mo se faamaoniga o lea mataupu.
“Manatua foi le matou service e 24 itula. E o ese le isi sifi o le ao ae agai atu le isi sifi o le po. O lona uiga e tatau lava ona iai se isi i le malaevaalele i taimi uma”.
O le tusa ma le kuata e tea ai le 12 i le po o le faaiuga o le lua vaiaso talu ai lea na ta‘ua ai le na taunuu mai ai o le Vaalele a le PolyBlue. O le faamatalaga a Togatalima Fouina e iai lava tama o le Ofisa i le Malaevaalele.
Sa fesiligia nisi o le Ofisa o Femalagaaiga ae o le tali muamua lava na fai mai … “ua lē lavavā ma sa tuai ae sa kilia (siaki) uma lava le pasese ma agai mai ai i fafo.
O le faamatalaga a le faauluuluga o puipuiga a le Malaevaalele, Nanai Junior Tuiletufuga, e lei faalogo i se tulaga faapea i ni lipoti a le latou aufaigaluega ma e tatau ona ia iloa se tulaga faapea ma e faigata ona talitonu e tulai mai sea faiga ona e lē tatau lava ona agai sa‘o tagata mai i le nofoaga e siaki ai tusifolau ma agai i le ofisa o tiute ma le fa‘asu pe a ave a latou uta se‘i vaganā ua mae‘a ona siaki e le ofisa o femalagaaiga.
“E lē o se matafaioi foi lea a le puipuiga o le Malaevaalele, ae a faapea o loo iai le puipuiga e lē mafai ona faatagaina se faiga faapea auā e tatau lava ona faatali se‘i oo atu nisi o le Ofisa o Femalagaaiga”.
Faaalia e Togatalima, e iai taimi e mafai ai ona agai ese mai i nofoaga e siaki ai nisi e na ona afea lava o le malaevaalele ae o loo faatali isi vaalele mo le faaauau ai o faigamalaga ae o le omai o pasese e mo Samoa lava ia ae tuua le malaevaalele e aunoa ma se siakia o tusifolau i le taunuu mai ai, e lē mafai ona tulai mai lea ituaiga faafitauli.
Na ia faapea mai e toe logo atu ia pe afai e maua e le tusitala se isi faamatalaga i lenei mataupu ma e lei toe maua se avanoa i le Ofisa Sili Lagolago.
O le ‘afa o le tasi i le po lava lea na tulaueleele mai ai le Ea Niu Sila ma e taunuu mai ua iai uma sui o le Ofisa o Femalagaaiga i le malae vaalele.
