Na tulaga ese vaaiga faapitoa ma matata esese o le Eseta, sa faaalia i le lotoa ma le nofoaga o faaaliga a le ASB i Greenlane i le faaiuga o le vaiaso o le Eseta, mai le Aso Faraile, Aso Toonai ma le Aso Sa (Easter ASB Show Ground).
O le faaaliga lenei e faia i tausaga taitasi, ma e faitau afe ma afe i latou e masani ai ona asiasi ma afea lea nofoaga i le taimi o le Eseta.
O vaaiga i faafiafiaga, o nofoaga mo ituaiga taumafa eseese, o mea faafiafia mo tafaoga faapitoa lava ia aiga, ma tagata taitoatasi.
O le itu i le faaaliga o faatoaga ma lafumanu eseese, sa tele ina agai i ai ma fiafia i ai le toatele aemaise lava aiga e iai alo ma fanau laiti.
O manaoga ma le naunau faatamaitiiti laitiiti i le fia pai ma le fia tagotago i tino o manu, e mafua ai ona tosina i ai ma matua i le vaega lea o faaaliga.
Ae o le itu o taumafa ma isi vaaiga, sa lilifa i ai tupulaga talavou ma le toatele o isi e fiafia i taumafa. A o isi lava foi e fiafia i le mafuta ma fetaui ai ma uo, aiga ma paaga i galuega, ekalesia, ma nuu.
O le itu sa maitauina i aso e tolu sa faatulagaina, o le taugata ma le tele o tupe faaalu ona o le tau o oloa, faafiafiaga, taumafa, ma e oo lava foi i le pakaina o taavale, na oo i le valu ($8) le totogi.
O taumafa sa matua matautia le taugata, e oo lava i meaai masani mo le fanau, sa amata maua i le tai fa tala ($4) i le hot dog e tasi, ma le tamai ipu o chips vevela e tasi.
O nofoaafi ma masini mo faaseega ma faaluega ma le anoano o isi lava faafiafiaga, e amata ulufale i le tolu tala ($3) agai i le sefulu tala ($10) mo le lua minute. Na pau le tulaga faamama avega mo nai matua ma fanau laiti, o le vaega o faatoaga manu, aua sa le totogia.
O le maunu lea na maunu ai e i latou sa tuufaatasia lea faaaliga tele i tausaga uma, nai aiga ma fanau ina ia auai atu, ae nana ai le itu tau pisinisi ma le soona sue tupe mai taga a tagata taitoatasi, aemaise lenei vaitau o le faaletonu o galuega ma le tamaoaiga.
E le gata i lea, ua faaaoga foi le igoa o le Eseta, e toso ma faatosina atu ai tagata lautele, ae mulimuli ane titina e le aufaipisinisi.
Ua le ese ma se faamatalaga a se tasi o alii taalo e faapea, e faaaliali na o le lima so‘a, ae nana le lima tu‘i malosi.
E faitau miliona tupe a le au faipisinisi, faapea le pulega o le Aai Malosi (Super City), na maua i le mae‘a ai o lea faaliga tele. E faamaonia lea, pe a faatusatusa i le tau ma totogi sa faatauina ai vaega taitasi uma sa i totonu o le nofoaga, ae sei vagana ai le au fai lafumanu, masalo na o ni nai vaega tupe sa faapele ai, ona o le faaaogaina o a latou lafumanu.
Sa iai foi nisi o le au faafiafia, ae o le mea moni e taumate foi le maua o ni seleni, pe sa fai lava foi i le va lelei ma le faaaogaina o le igoa o le Eseta, e faatosina atu ai i totonu o le malae.
E lei fia talanoa tele mai le isi o alii Faufautua o le Aai Malosi (Super City), ina ua fesili i ai le Samoa Times, Pe aisea lava ua leai ai se pa puipui ma se tulafono o taumafa e tau taofiofi ai le soona pule saua o tagata faipisinisi e sii maualuga le tau o taumafa ma oloa.
Ona talu ai o malologa ma tafaoga a aiga ma fanau i faatosina o le Eseta, peitai ua faaaoga sese e saili ai tupe a le au maumea ma le au faipisinisi.
O le isi tulaga ona sa maitauina le leai o ni au faipisinisi a le Pasefika sa auai i nofoaga taitasi o taumafa, ma vaega saili tupe mo ia aso e tolu.
O le faamanatu mo aiga pe a fuafua e agai i lea faaaliga mo le lumanai, e sili lava le tapena ma sauni taumafa ma vaiinu i le fale, a o lei malaga i ai mo tafaoga.
Ona o le mea moni e le ititi ifo i le $200 le tupe e migi ma faoa e lea nofoaga, ona o manaoga oso faafuasei ma le tuinanau ae lei fuafuaina.
O le susuga ia Simon Matafai ma lana aufaipese, le Auckland Gospel Choir sa maua lo latou avanoa e faafiafia ai ma tau aumai le agaga o le Eseta ia latou pesega ma fatuga i le taimi na pepese ai.
Sa matagofie ma ese foi lagona ina ua faalogoina pesega e uiga i le Eseta i le gagana Samoa ma le gagana faa-Pasefika, ina ua faafiafia le aufaipese suifefiloi a Simon ma le vaega.
E manaia foi le asiasi i ai na o i latou e poto le faatatau ma lava le silafia i le faaaogaina poo le paketiina o seleni, aua o le mea moni e faoa faamalosi ai tupe e le aufaomea ma le au ola le fuafuaina i lea nofoaga.
E matua galo atoa le agaga ma faalogona o le Eseta e pei ona faamuamua ma maketiina ai oloa ma taumafa, ma faafiafiaga a le aufaipisinisi.
