Faigofie auaunaga mo i latou faaletonu le vaai

O se faamama avega lenei mo nai o tatou tagata o loo fia maua se fesoasoani faafomai mo le siakiina o o latou fofoga poo mata, ona o lea ua tatala i Motootua, le nofoaga fou o le Samoa Vision Centre, o ina o le a faatino ai lenei auaunaga, o loo fesoasoani atu ai i tagata Samoa uma o loo moomia se togafitiga mo latou mata.

O se faiga paaga a le Senese Inclusive Education Services ma auaunaga a le Maota Gasegase i Motootua, lea ua amatalia ai lenei nofoaga fou, e agai ane i ai le mamalu o le atunuu e siaki o latou fofoga, ma fua foi ni a latou vaaiga poo matatioata, i ni tau e mafai lava ona gafatia e le atunuu.

Na amata lenei auaunaga sa mo na o fanauiti ma nisi o le atunuu sa mafai ona oo atu mo le fuaina o a latou vaaiga, ae o lea ua faalautele nei mo le siakiina ai foi o mata. E toalua i laua o loo galulue ai lenei nofoaga, ua iai agavaa faapitoa (qualified spectacle technicians) mo le faatulagaina lelei o matatioata talafeagai mo fofoga o i latou e moomia.

O i laua ia o Petelo Ulugia mai Vaiusu ma Faasuaga Toleafoa o Sinamoga.

Sa faagasolo aoaoga a i laua nei e le gata i Samoa lava, ae na oo atu foi i Ausetalia mo le toleniina e nisi foi ua iloga le tomai i nei lava matata, e pei o le susuga Steve Maskel, i lalo o le faigapaaga lenei i le va o le Senese  ma le Royal Institute for Deaf and Blind Children faapea le vaega tutotonu o aoaoga tau le tausiga o mata, le International Eyecare education centre under the Vision 2020 Global Consortium for Avoidable Blindness.

Ua nofo sauni nei le aufaigaluega lava aoaoina aemaise foi le lava tapena o mea uma e faaaoga mo a latou auaunaga, mo le fuaina o matatioata i soo se tele e fetaui lelei ma fofoga o tagata taitoatasi e sailia la latou fesoasoani.

E le gata ua fou uma le nofoaga ma meafaigaluega, ua lelei ona aoaoina le aufaigaluega, ae o lea foi ua taunuu i fanua le tamaitai o Erna Takazawa,  o ia se uluai Samoa ua taua tonu o se Fomai mata (Optometrist), pe a faauu mai ia Me, ma lona faailoga o le Bachelor of Optometry, mai le Iunivesite o Aukilani.

O le faanaunauga lava lea o le tamaitai o Takazawa, e fia galue e fesoasoani i tagata, ma ina ua ia iloa ane e leai se fomai mata i Samoa, o le mafuaaga lea na ia filifilia ai loa lenei tomai.

E atamai tele lenei tamaitai i le tomai o loo aoaoina ai nei, lea o le a faauu mai ai i se tulaga first class honours, ma isi ona faailoga e lua mai le New Zealand Association of Optometrists i le 2008 ma le 2011.

O le nofoaga fou o le Samoa Vision Centre i Motootua o le a tatala mai le 8am i le taeao e oo i le 4pm i le afiafi, mai le Aso Gafua i le Aso Faraile o vaiaso taitasi.