Ua militino faatasi gagana ma loto i le aiga e tasi ina ua tau lau o le moemitiga o le alii o Hiki Ama mai Tonga i lona fia faatasi atu lea i lana manamea ia Beverley Matamua Fraser lea sa ia faananau i ai.
O le taeao o le Aso Toonai, 31 o Oketopa o se aso lagilelei na saunia e le Atua e tuufaatasia ai lana fanau e ala i le sauniga Paia o le faaipoipoga. O lea faamoemoe sa faataunuuina i le malumalu o le Ekalesia i St Paul Methodish Church i Otara, ma sa tumutumu ai aiga o le alii faaipoipo ia Hiki Ama mai Tonga, faapea aiga uo ma ē masani a le tamaitai ia Beverley Matamua Fraser faatasi ai ma ona mātua ia Pastor Matamua Enoka Fraser ma Loreta Fraser, ma ona tuagane e toafā na malaga mai Ausetalia.
O le taitai o le sauniga o le susuga le faafeagaiga ia Pule Lualua o le Ekalesia Samoan Church of God i Otara, ae o le faafeagaiga ia Enoka Fraser na ia foaia lona alo tamaitai ia Beverley i le alii o Hiki e fai ma ana avā faaipoipo.
O le faamalosi a le taitai o le sauniga i le ulugalii fou, ia fusia le aiga i le alofa, ia alofa le tasi i le tasi, ma ia faavae mea uma i le papa o Iesu Keriso e manuia ai le aiga. Na saunia foi le tatalo faapitoa mo i laua ma faamanuia i le aiga fou. Na sosoo ma le taumafataga na faia lava i le hall a le Ekalesia, ma sa vaaia ai vaaiga eseese i tu ma aganuu a atunuu e lua. O āu o mātua fanau, o le vaaiga lea sa iai i lea aso i le galuega fita a aiga na lua sa faatinoina le polokalame; e fai o le matagofie o le teuina o le hall ae o faafiafiaga na saunia e atunuu e lua, poo aiga na lua.
O le tofa ia Tofa Tinifu Tanielu Winterstein na fai ma fofoga o le aso, ae o le susuga i le faievagelia mai Brisbane i Ausetalia ia Chris Purcell ma lana team sa faafiafiaina le mamalu o le auvalaaulia i musika suifefiloi. O le faleaiga a le Continental Catering sa nafa ma le gaseseina o le taumafataga.
O loimata o le fiafia ae sa atagia ai le pele i tuagane o Beverley o le latou tuafafine, auā o le ioimata o le tama o lona tuafafine, auā e toafitu tama ae to‘a 5 teine o lenei fanauga. Na molimau foi le alii faaipoipo i le amataga o le la mafutaga ma lana pele seia oo ina tuufaatasia le la aiga, na ia faafetai foi i lona aiga mai Tonga i le lagolago ma tapena mea uma mo laua, faapea foi lana faafetai i le aiga o lona toalua i sauniuniga uma ua matagofie ai lo la aso.
Na taualuga le faamoemoe i faaaloaloga na fai ai le fofoga o le aso ma sui o aiga na lua ma tutootoo e momoli le agaga faafetai i susuga i faafeagaiga ma le mamalu o le auvalaaulia sa auai, faatasi ai ma meaalofa na saunia e le aiga fou, ma faaiu ai loa i le tatalo na saunia e le taitai o le sauniga, ma tatala ai loa le filialii.
