O le Malumalu Sa o le ekalesia o le Aupaia o Aso e Gata Ai i le aai o Sini na tuufaatasia ai lo la aiga fou ma fai ai la la osiga feagaiga i luma o le silafaga a le Atua, o la auaiga na lua aemaise o le valaaulia ma Samoa na potopoto, tainane le Aufaigaluega totofi i ē na galulue i le fata ma ē na tapuai.
O le alii faaipoipo o Eric o le alo o Too ma Nive Tito mai le aai o Melepone, ae o le tamaitai Toga o Heilala o le alo o Siu ma Maugaloa Faivakimoana. Na matuā faatumulia le malumalu i le sauniga paia o lo la aso tele, ae na leai se ofi o le malu o taumafataga i le pitonuu o Bonnyrigg Heights i le aai o Sini i le valaaulia e silia ma le ono selau na aofia potopoto e molimauina ma faamanuia atu i alo ma fanau, o nisi o o la tauaiga na malaga mai Samoa ma Toga, Niu Sila, Amerika ma Hawaii aemaise o Setete eseese o Ausetalia.
A o tali le sua ma alo i le taumafataga, na faasolo faafiafiaga faa-Samoa faapea Toga, ma faailoa foi valevale alofa i tu ma aga i fanua a atunuu e lua e ala i faafiafiaga faapea meaalofa na aao mafola i ai uosili ma aumea mamae ma aiga na lua.
O le Fofoga o le aso na faatautaia lava e o la uso le alii o Spencer le uso o Eric ma le tamaitai o Witness le uso o Heilala, musika ma faafiafiaga mālie i pesega na saasaa ma luilui ai le valaaulia na feagai ma DJ Pallin.
Na maualuga naua le aso taupoina ina ua mafola le paia o aiga na lua i faaaloaloga mo le ofisa fai paaipoipoga ma le aufaigaluega paia, aemaise o le paia i le auvalaaulia, o pelega lava o alo ma fanau ua faamanuiaina.
Manuia lo lua aiga fou Eric ma Heilala, e lē gata i le tino ae silisili le faaleagaga, taiulu pea le Atua i o lua laasaga uma. Alofaaga mai o lua aiga uma ma mātua, aemaise lava ou mātua Eric, Mum ma Dad Too ma Nive ma nai ou uso ma tuafāfine ma ou cousins uma i Melepone, and also Love and Prayers from your auntie Maria and your cousins. Stay Blessed Eric & Heilala.
