E le faigofie le galuega oloo faia e tusitala ma le aufaasalalau. E le ese Samoa ma isi atunuu i faafitauli o lenei tautua aemaise o luitau e feagai ma taitai o Malo ma atunuu pe a faafesagai ma ē o faia lenei galuega ile taimi e fesiligia ai ini tali e faasino ini mataupu ogaoga ma maaleale.
Na saunoa iai le afioga ile Palemia susuga Tuilaepa L Sailele Malielegaoi i ia luitau ina ua faatoa avea ma sooupu ole Malo e feagai ma le faailoaina o faaiuga ale Kapeneta. Ile tapunia o polokalame sa faagasolo ile masina o Me 2017 mo le faailogaina ole aso ole saolotoga o tusitala ma tagata faasalalau ile lalolagi e pei ona aloaia e Malo Aufaatasi, na aami aloaia ai ele asosi o tusitala i Samoa le JAWS poo le Journalist Association of Samoa le taitai ole Malo le afioga ile Palemia nate tapunia aloaia ise saunoaga autu.
“Ole taimi lena faatoa ou faia le galuega ole faailoa o mataupu ale Malo a‘o iai lo matou taitai le Palemia o Tofilau, sa ou iloa ai le tele o faafitauli ile tou galuega”. E lei faailoaina e Tuilaepa poo ā tonu ia faafitauli ae sa ia afea ai nisi o mea na tutupu i tausaga ua mavae. Ole tagi ale Itu agai na molitai ai ile Faamasinoga le Malo i lea vaitau ile noatia o avanoa ole Itu agai e faaaogā ai le leitio ale Malo le 2AP.
Na faailoa ai foi e Tuilaepa le fasiga ose tusitala sinia ona ose tala na ia tusia na tuua‘ia ai lea tamalii ua na faaleaga se tamaitai i lana lipoti na faasalalau e se nusipepa sa galue ai. Na faailoa ai foi ele Palemia le fiafia o tusitala e saili ni latou tala e tusi i faaiuga fai ale Malo ma le sailitupe atu ole asosi a tusitala ile Malo.
Ole social media poo fesootaiga televavave e pei ole facebook, twitter ma isi ole autu lea o polokalame sa faatalanoa ai nisi o fanau aoga, o tina, faapea sui sinia ole galuega tusitala i auala o faasalalauga i televise ma leitio i Samoa. Ole naunautaiga ole asosi a tusitala ia aoaoina tupulaga ma tagata lautele i aogā lelei ole social media ae lē ole faaaogā e faatupu ai vevesi ile va o tagata.
Na saunoa le Palemia ma ia afea le fesootaiga lea ona ua ia ta‘ua ua fiafia le toatele e faaaogā. Na ia ta‘ua ai foi nisi o faamatalaga i luga o social media ua lalau ai le faia o ana affair, ae ole finagalo ole taitai ole Malo e le popole iai auā e le moni ia faasalalauga. Fai mai le palemia ua oso ai lona mimita i ia faasalalauga sese ma le lē moni.
Ole taualuga ole saunoaga ale taitai ole Malo na ia faailoa ai le agavaa ole asosi tusitala a Samoa ise fesoasoani tau tupe mai le Malo ise faasoa ole a aofia ai isi faalapotopotoga tumaoti. “Ia faaoo atu ia te au se tou talosaga tusitusia ona ou tuuina atu lea ile Matagaluega o Tupe”. Ole agaga fiafia lea ole Peresetene ole JAWS le tofa Apulu Lance Polu ona ole a maua ai se fesoasoani ile faatuina ose ofisa autu e tapuvae tasi iai galuega ale asosi.
