O lea ua faalauiloa le vaega lona lua o tala ua tuufaatasia e le tamaitai tusitala lauiloa o Samoa o Leilani Wendt Young, le tusi lea ua faaigoaina Telesa – ma o le maua ai o sana lomiga o le tusi lona lua na ta‘ua ai e le Afioga Telesa Elena Asi Blakelock, na matua faateia ai o ia.
O le Afioga Telesa Elena o lea faatoa foi mai i Samoa ma lona alii ua mae‘a le la galuega na avea ai le Afioga Asi James Blakelock ma Hai Komesina o Samoa i Niu Sila.
O le taimi la na faalauiloa ai le vaega lona muamua o le tusi lea e lei iai le Afioga Telesa i Samoa ma e lē iloa le faaaogaina o le tusi muamua a le tamaitai tusitala i le suafa ua faaee ia te ia e lona aiga.
O le faaaliga a lenei tamaitai, ua faateia o ia i le tusi lona lua lea ua ia taulimaina. “E foliga mai ua faaaoga e le tamaitai tusitala le igoa o lenei aiga e pei o se igoa faataatia i le auala tele, e leai se tāua,” o le faamatalaga lea a le Afioga Telesa Elena.
Faaalia e lea tamaitai o lea o le a agai e saili se finagalo faaletulafono i lenei mataupu ona ua laga e sui o lona aiga lea mataupu e tatau ma talafeagai le saili o se manatu faapea.
Faaalia e lenei tamaitai o lona iloa na o le latou aiga lava e iai le suafa lenei ma e le o se suafa e soona ave solo pe soona faaaoga e nisi.
O le suafa na ia ta‘ua ua ave i ai le faalagilagi o le Feagaiga a Faumuina ma na ia ta‘ua sa tatau lava i le tusitala ona tapa so latou lagona i le faaaoga o lenei igoa mo ana lomiga ua faalauiloa nei.
Faaalia e se isi foi sui o le aiga lenei, o Salaevalu Ulberg, e solitulafono tele le gaioiga ua faia e Lani Wendt Young ona o le meatotino le suafa Telesa i le latou lava aiga. E leai foi se isi tagata Samoa e le tau i le aiga lenei ua ia faaaoga faapea le suafa o le “Sa‘o Tamaitai” o Lepea.
O le mau a lenei tamaitai, e foliga mai ua le amanaia e le tamaitai tusitala lo latou aiga ma ua agai lava faaaoga lenei suafa e aunoa ma se faatagaga mai i le latou aiga.
O le faamatalaga a lenei tamaitai o Salaevalu o lona tuaa na Telesa, o le tuaa o lona tuaa (grandmother) sa faapea foi ona suafa ia Telesa. Na ia faaalia e leai lava se isi ua soona faaaoga fua lenei measina a lona aiga.
Ta‘ua foi e Telesa Elena, o lona malamalama o le tusi lenei e faatatau i se mafutaga faaleuo ma e le o faatatau i le suafa Telesa, ae o le faaaoga lava o le suafa ua faia ina ia faatosina ai tagata faitau ae ua le manatu i tagata e ana ia suafa nei.
Sa fesiligia le vaega o le Matagaluega o Pisinisi Alamanuia ma Leipa, i le tulaga o iai tulafono ma aiaiga o le faaaoga lea o le igoa poo le suafa Telesa, i le tusi a Leilani Wendt Young.
O le Matagaluega lea e nafa ma le vaaia o tulafono o loo faapea ona vaavaaia ma faamalosia le aia tatau a i latou e iai tomai faalemafaufau – lea e aofia ai mataupu e pei o fatuga tau pesega, o tusitusiga, o lauga ma isi tomai faalemafaufau ua tele ina tulai mai ai faafitauli.
Faaalia e le tamaitai o loo faauluulu i ai lea vaega o le Matagaluega sa le MCIL e leai se tulafono e tapu ai le faaaoga o igoa poo suafa mo tusi faitau.
“Sei vagana o le aotelega poo le tusitusiga atoa ua faatatau i lea tagata ma ua faaaoga e le tusitala e aunoa ma se faatagaga ae e foliga mai o le tusitusiga o se talafatu e faatatau i se tamaitai, ma o iina la e ono faigata ai le finauga a le aiga aua e leai se tulafono e patino tonu i le faaseā e pei ona ta‘ua,” o se saunoaga lea a le tamaitai o Margaret Fruean o loo vaaia le pulega o tomai faalemafaufau.
Na fesiligia le Ofisa o Pepa Fanau ae na ta‘ua ai e lea ofisa, o loo iai le tulafono e ono fesiligia ma taofia ai le lesitala o soo se suafa o se tasi i luga o se pepa fanau pe afai e vaai atu o suafa matai ia o le a faaaoga i suafa muamua o soo se tasi.
Ae e le aofia ai suafa taupou ma suafa o Sa‘o Tamaitai o le faamatalaga lea a le Ofisa o Pepa Fanau, e faasa lava na o suafa matai.
Na fesiligia le ofisa o faamasinoga ae toe faasino mai le Ofisa o le Fono Faitulafono a le atunuu i lea lava mataupu.
O le faamatalaga a le Ofisa o le Fono e iai le puipuiga o measina ma meatotino a aiga e pei la ona iai suafa e pei o Telesa.
“Afai e le o se mea totino lava ia a se aiga, e faigata la ona faapea o se meafaitele,” o le faaaliga lea a Fuimaono Fereti o le Ofisa o le Fono. “O le gaioiga talafeagai lava o le fesootai i le aiga e ana meatotino nei mo se faatagaga”.
“E le o se igoa e fia alu sau lava soo se isi e faaaoga ma faaaoga, o igoa tāua o lenei aiga ma e foliga mai ua avea le tomai ua maua e le tupulaga o lo tatou atunuu ma auala ua le tapa ai aiga e ana measina ua o latou faaaoga,” o se saunoaga lea a Salaevalu Ulberg, o lona tina na faaee i ai le suafa ma le tina o lona tina lea e igoa ai.
“O lea ua talanoa lo matou aiga ma ua malilie e tatau ona agai i le tulafono e fesiligia le sa‘o o lenei faiga aua e oo mai lava i le taimi lenei e lei iai lava se fesootaiga ua maua ma le tamaitai ua tusia lenei tusi”.
E lei tali mai le susuga Leilani Wendt Young i se taumafaiga a le tatou ofisa e fesootai mai e faatatau i lenei mataupu.
