O le tina Samoa e suafa ia Loata Taufua Patolo, ua faatonuina e toe totogi le $68,000 talu ai ni faiga piopio ma le taufaasese sa ia faatumuina ai talosaga mo tupe i lalo o le polokalame o le Working For Families, i le faaaogaina o donations ma aso malolo i taimi e vaaia ai se pepe fou (parental leave).
O lea tina sa ia faaaoga nisi o le fanau o loo i fafo ese o Niu Sila, ma le isi foi o tamaitiiti e le o sana tama, e maunu ai ni seleni mai le Matagaluega o Lafoga, ma ia mauaina ai ni vaega tupe tetele.
Na faamaonia le pepelo o faamaumauga ma faamatalaga uma sa faaaogaina e lea tina, sa mafua ai ona ia maua fua seleni, ae le agavaa i ai.
E fitu masina ua faasalaina ai i le falepuipui i lona lava fale (home detention).
E maua le faafitauli o lea tina, ae ua sauni atu foi e toe faila le vaega tupe e tusa ma le $31,000. O lea tina Samoa, na faamaonia ona moliaga i le solitulafono i lalo o le Tax Administration and Crimes Act, poo le faatauanauina o seleni i faiga pepelo ma le piopio.
O le faafitauli o lea tina, ua toe faamanatu ma toe faamamafa ai nei ma lapataiga a le Matagluega o Lafoga a le Malo mo tagata lautele, ina ia silasila toto‘a, ma ia aloalo ese mai faiga piopio ma le taufaasese.
Ua mae‘a ona faailoa e le Matagaluega, o soo se faiga pepelo lava e manatu tagata e lilo ma natia, e mautinoa lava e maua.
O se lapataiga mamafa mo tagata uma, ina ia aua nei mafaufau i ni faiga faapea, ae ia soifua pea ma ola i le amiotonu ma le olaga mamā ma le saoloto.
O le tausaga 2006 e oo mai i le 2011, o le umi lea sa nofo ai pea, ma faia amioga le talafeagai ma le solitulafono a le tina e pei ona faasalaina nei.
Sa faamaonia mai e le alii Pule, Patrick Goggin faamatalaga uma, atoa ai ma le faaiuga ua faia ia Patolo.
O lea foi tina e alaala i Manukau, Aukilani i Saute, ua amata tuliina nei lona faasalaga e fitu masina e falepuipui ai i lona lava fale.
O nisi faiga piopio e pei ona ta‘ua, e le gata ina talosaga tupe mo tamaiti o loo fafo talu mai le 2007, toe tauanau foi ma se vaega tupe a se isi foi tamaitiiti e le o i lalo o lana tausiga, ae eseese foi ituaiga lafoga sa ia faaaogaina e maunu ai tupe.
Faaalia e le alii Pule o le Matagaluega, o le isi foi lea solitulafono e ese mai i le pepelo ma le faaaogaina o faamatalaga sese. E masani ai i taimi faapenei i tausaga taitasi, ona matuā pisi le aufaigaluega ma le Matagaluega i le tau faasoasoaina o talosaga a tagata lautele.
Peitai na ta‘ua e se faamatalaga a Patrick e faapea, e ui i lea pisi, ae o le a le avea ma auala e misi pe faaletonu ai le vaai i tulaga e masalomia e sese, atoa ai ma le silasila toto‘a i le tele o isi talosaga e ao ina suesue atili i ai, a o lei faauneina seleni.
