Ua fai si loaloa o tausaga ma masina o faamasani manatu ma lagona o le ulugalii fou na tuufaatasia ma feofoofotai o la alofa i le faaiuga o le vaiaso talu ai i Brisbane, le tamaitai o Siniva Fepuleai ma le alii o Fono Falani.
Talitonu o le umi foi lea ua masani ai le tama i uiga o le teine ma e ono tumau ma moni pea ma avea o se alofa faifai pea e lē maluelue gofie i le malolosi o ‘ave kolosi a le tiapolo.
O lea aso tāua na molimauina e aiga, uo ma ē masani i se togalaau matagofie, a o fesilafai ma pulatoa ane i ai manufelelei sa faapepepepe ma tausasami i le suamalie o fugalaau mātala na molimauina le osiga feagaiga, ua atili aulelei ai lea vaega o le setete o Kuiniselani. Na matuai talitonuina e le ulugalii fou le faamaoni o le Atua e ala i o la faamoemoega sa tuupo mai, lenei ua tini ma taunuu manuia.
O se sauniga foi na sioa ma faalologo le aofia a o saunoa manino lana auauna i se upu faamalosi e taiala ai le aiga fou, sa fofogaina e le susuga i le faafegaiga ia Pastor Sa‘u Lologa o le ekalesia o le Au Uso Kerisiano Samoa i Brisbane.
O mātua o le alii faaipoipo ia Fono, o le tamā o Niuafolau Falani (Mulifanua) ma le tinā o Vaiama Falani (Sataoa).
O mātua o le faatoanofotane ia Siniva, o le tofa ia Levaopolo Segauea Fepuleai (Saleaula) faapea le tinā o Sepora Fepuleai (Apia).
O nisi o malo faaaloalogia na iai susuga i faafeagaiga ia Afa Pulotu na malaga mai i Aukilani faapea le susuga i le alii Misionare ia Fepuleai Usufono Fepuleai,o ia foi lea o le Faatonusili o le faalapotopotoga a le Ywam i Samoa, faapea le faletua ia Liutoga Fepuleai o se tasi o tamaitai faipisinisi i Samoa.
O le tofa ia Levaopolo Kalama Seve (Foaluga), na malaga mamao mai lava i Melepone ona o le aso o Siniva ma Fono, o ia sa autasi i ai aiganalua e faafetaia le aufaigaluega a le Atua, faapea le paia o le au valaaulia, aemaise faaaloaloga masani a Samoa i aso faapenei.
O le tofa ia Leautuliilagi Malaeoalii Sogialofa Vaa Leapai na tulai e fai ma sui o le auvalaaulia e faafetaia le paia o aiga i palapala-a-malo ma le taumafataga felanulanuai.
O le fofoga o le aso, o le sui o le tatou leitio o le Penina o Asuisui, le susuga ia Terry Tuisavaii Filimaea Fauea mai Vaiala.
Tele ausiva mai soo se atunuu sa faatinoina e alo ma fanau a le ekalesia ma le aiga na faafiafiaina le aso fiafia o Siniva ma Fono Falani.
Na taape le aofia ma oso e lē gata o le laulelei i taumafa faaleagaga ae faapea foi le taumafataga faaletino na tapenaina e le tofa ia Poulava ma Lorna Matautia, ua lauiloa i Brisbane i le faleaiga ua igoa o le “Uncle Sams Catering”.
