Ina ua mae‘a le sauniga o le lotu o le taeao o le Aso Sa, aso 3, Aperila, 2001, na potopoto nisi o le aulotu, le fanau, uo ma aiga o le Faletua ia Alison aemaise le susuga i le faafeagaiga Tavale Mataia, mo le faamanatuina o le 60 tausaga o le soifua, ua faamanuiaina ai e le Atua le faletua.
Na faafetaia e le tama faifeau ia Tavale lona faletua ma faamatalaina le agalelei o le Atua i lona ola tauivi aemaise le tausiga o le fanau. Na auai uma o la alo o Taua, Stephen, Nathan, Antony, ma o latou taitoalua ma fanau.
O le faletua ia Alison, o loo avea nei ma faatonu o le ‘Centre of Academic Preparation & Support, o se tasi o lala faapitoa o le Kolisi a Laidlaw i Henderson. O se tina faaleagaga mo le ekalesia a le Word of Life i Henderson.
E tele ni tausaga o galulue faatasi ma le tamā ia Tavale o le uluai faatonu o le galuega a le YFC i Samoa, mo le faafaileleina o agaga o tama ma teine talavou Samoa, ma le a‘oa‘oina o i latou i le Upu a le Atua.
O se tina ola tauivi, aemaise le ola a‘oa‘oina; ua mae‘a ona ia ausia le faailoga maualuga o le Masters in Linguistics, a o lea foi o loo ia saili atu ma aoga i le isi foi faailoga maualuga o le Masters foi i le mataupu o le Theology.
