Ua mautinoa e lē auai fautasi e fa o Tutuila ma Manu‘a sa valaaulia mo le tausinioga o faaga tama i le tai i le faailogaina o le Iupeli auro poo le Tutoatasi i le masina fou. Sa fesiligia ai le alii palemia Susuga Tuilaepa Lupesoliai Sailele Malielegaoi, i sona finagalo ae o lana tali, ua lelei foi, o le a matagofie ai le maimoaina o tatou lava tuugafautasi.
Ua ta‘ua mai i lipo timai Pagopago e lē malaga mai nisi o fautasi e pei o le Aeto mai Pagopago ma le Satani mai Nuuuli. O le mafuaaga ua le lava le taimi e tapena ai, ma le isi e le manaomia ni foe sipuni e taualo ai vaa ae o foe Samoa mao‘i e ta i le laau.
“E le o se taimi muamua lea e iai isi taimi e avatu ai valaau ae ua le talafeagai foi ma a latou foi fuafuaga ma e le o se taimi muamua la ua tupuai se mea faapea.
E oo foi ia tatou e le taugofie tapenaga aemaise a la ua taoto taiala a le komiti o tuuga e fausia ia tutusa fausaga e fau i laupa pa.
Manatua la o tatou uso i Tutuila o le tele o vaa e le o ni vaa e fauina i ni laupapa atonu o se tasi lena o mafuaaga, ae e iai le tāua o le iuga ua faia e le komiti o le tuuga ina ia tutusau ma le fausaga o vaa ia aua ne‘i televave tele o le isi vaa ae ia faalagolago i le malolosi o auvaa”.
Faaalia foi e le Palemia o le a faafaigofie atili le tuugavaa ma manaia i le maimoa ona o le a lē auai Sa mai Sasae.
O le aso 30 o le masina nei o tuuga e sailia ai Sa e valu e o i le suega o le siamupini e faia i le aso 5 poo le aso mulimuli o polokalame o le Tutoatasi.
Ua faailoa e le komiti o tuuga fautasi o le tuuga e amata atu i gataifale o le taulaga o Apia i le vaega o loo tini i ai tuuga, ona agai lea i Faleula i le nofoaga i Faleula sa masani ona amata ai le tuuga i tausaga ua mavae, ona toe liliu mai lea ma tini i le vaega na amata atu ai.
O le tausaga ua mavae i le Sisigafu‘a o le 2011 na suia ai le faatinoga o le tuuga i le faaaogāina o le mamao lea. Sa fuafua i le tausaga ua mavae a o tapena mai le fautasi o Tutuila o le Aeto e amata mai i le gataifale loloto e tusa ma le lima maila le mamao i tai mai le uafu tele i Apia peitai sa toe suia i le toe foi i le nofoaga masani ona sa loulouā ma sii le tai i le tausaga ua mavae i le aso na fai ai tuuga lea na tulaga lua ai le Aeto mai Pagopago ae mua le Tolotolo o Tamauli mai Salelologa. E 14 fautasi o le a sailia ai Sa e valu e o i le suega siamupini o tuuga o le Tutoatasi.
