“O le naunautaiga lava o a‘u ma le mafutaga i Aukilani ia maua le maopoopoga”..Afemata Falefa Misi
O le mafutaga a Alii ma Tamiatai sa avea ma Malu o le Malo o Samoa poo alii ma tamaitai sa galulue ile Matagaluega o Leoleo ma Falepuipui i tausaga ua mavae ile faamalosia o le tulafono ma puipuia meatotino a le malo le atunuu ma tagata, i Aukilani o le a tuua Aotearoa i le vaiaso a sau mo Samoa i le fia auai i le faatasiga poo le reunion o le a toe feiloai ai i latou uma sa galulue o ni Malu o le Malo.
A o lei malaga le mafutaga ua mae‘a ona faailoa i ai e le Peresitene o le mafutaga autu poo le Faalapotopotoga o alii ma Tamaitai sa galulue o Malu o le Malo i Samoa, le polokalame ma le fuafuaga atoa o le faamoemoe.
O le feiloaiga a le mafutaga i Aukilani ma le peresitene na fofola ai le fala ma fefaasoaai le mafutaga a Aukilani ma le taitai o le faalapotopotoga autu i Samoa, lea sa faailoa ai e le peresitene nisi o atinae o loo taulai i ai le vaai i le lumanai mo le agai i luma o galuega fesoasoani a le faalapotopotoga, e le gata mo sui o loo aumau i isi atunuu e pei o Niu Sila ae faapea foi i sui o loo nonofo ma alala i Samoa.
“O se feiloaiga tāua ua tatou feiloai ai ma lau afioga i le peresitene aua matou te manatu o lea faato‘ā maua se tatou feiloaiga talu mai tausaga ua alu sa amata faavaeina ai le faalapotopotoga i Samoa”.
Na faaalia foi e le taitaifono o le mafutaga i Aukilani le afioga Afemata Afemata Falefa Misi, sa faauluulu i ai le vaega o faamaumauga o solitulafono ma le vaega e suesueina tulagalima a le Matagaluega o leoleo i tausaga ua mavae, e le aumaua ni mafutaga faapea o le a toe lalaga ai ni fuafuaga mo le manuia o le faalapotopotoga aemaise ua toatele sui ua aumau i isi atunuu e pei o Niu Sila.
O le polokalame o le reunion e amata i le aso 31 o Me i se ‘ava o le feiloaiga sosoo ai ma le fonotaga tele a sui uma, lea o le a talanoaina ai nisi o atinae.
O ia atinae e aofia ai le silasila o le faalapotopotoga e faavae aloaia se mafutaga i Niu Sila e tusa ma aiaiga o le Faavae o le faalapotopotoga i Samoa ina ia mafai ona maua le fesootaiga i fuafuaga e mafai ona faatino ai galuega fesoasoani mo le matagaluega o leoleo ma falepuipui faapea galuega fesoasoani mo isi faalapotopotoga tumaoti e manaomia se sao o le asosi o alii ma tamaitai sa galulue o Malu o le Malo o Samoa.
O nisi o fuafuaga e faamautu i le faatasiga i Samoa o le vaavaai e faavae se vaega faapisinisi o le faalapotopotoga e faatino ai se itutino mo le faia o suesuega tumaoti poo se private investigation firm, ma se auaunaga tau i le puipuiga poo se security service.
“O ni faamoemoega tāua tele auā e mafai ona saili seleni ai le faalapotopotoga ma faaaoga foi ia i le tomai o alii ma tamaitai sa maua mai i le matagaluega o leoleo”, na faaalia ai e le peresitene.
O le toatele o sui matutua o le asosi o loo iai le tomai aoaoina i galuega tau i le faia o suesuega i solitulafono eseese ma o le isi vaega tāua lea na faaalia e le taitaifono o le mafutaga i Aukilani e tatau ona iai se tautua e faaauau ai ona faaaoga.
O le reunion e mo le fa aso lea o le a savavali ai le mafutaga i le savali faaaloalo o le Tutoatasi, faapea se latou fiafia e faia i le po o le Aso Faraile aso muamua o Iuni ma se tafaoga poo se picnic e alu i le matafaga o Faofao Beach Fales i Saleapaga i le Aso Toonai 2 o Iuni, ae Aso Sa ai 3 o Iuni faia le feiloaiga mulimuli ma tau mavae ai le mafutaga.
O le afioga Lupematasila Mulinuu o loo fuafua na te taitaia le faiga malaga a le mafutaga mai Aukilani i le faamoemoe i Samoa.
Sa faia sailiga tupe a le mafutaga mo lenei faamoemoe na faaalia e le laulau le lagolagoina e le atunuu o a latou siva ma o se lagona faagaeetia lea i le mafutaga.
“E te silafia foi e ta‘u loa se fuafuaga ae e silafia e le tatou atunuu o se polokalame a nisi sa galulue i le matagaluega o leoleo, e le mafai ona solomuli le lagolago mai”.
