“O le taimi lava e talia ai se tofi o se nuu ma se afioaga e le Kapeneta e ave i ai taiala ma faiga faavae a le Malo e faatatau i lona tofi, ma ua silafia uma e Pulenuu ma sui o le Malo le tulaga lena”. O le finagalo lea o le Minisita o loo iai le vaaiga o le lotoifale o nuu ma afioaga e aofia ai ma tofi Pulenuu ma sui tamaitai poo sui o le Malo.
O le faateaina o tofi Pulenuu o Satapuala ma Magiagi o loo fesiligia pea e nisi pe ua mafua i se ā, ona ua avea vevesi ma feteenaiga na tulai mai i le va o le Malo ma ia afioaga ma mafuaaga o le faia o lea faaiuga e le kapeneta.
Na saunoa faamalamalama le minisita i le mafuaaga ma ia ta‘ua ai, o le faaiuga e tutasi lava i le kapeneta ma e mafua foi ona iai se iuga faapea pe afai ua lē lagolagoina e le pulenuu le finagalo o le malo i se atinae i totonu o se afioaga. “O le tofi lea o loo manino i faiga faavae a le malo e tatau i pulenuu ona lagolago i le Malo, ae lē o le tetee i fuafuaga mo le lelei o nuu ma afioaga”. O le mataupu ia Satapuala e lē o toe pogisa ai le atunuu ona o le feteenaiga tau eleele i le va o alii ma faipule ma le malo i le fausia o le falemai faaitumalo i Faleolo ae avea ma auala na taumafai ai lea afioaga i le pule a alii ma faipule e taofi le galuega ona o le latou mau o o latou eleele e ui o le fanua atoa o loo iai pea faatoaga niu, ma le kofe a le Esetete Tausi o se faalapotopotoga a le Malo.
Le mafuaaga lea na faia ai le faaiuga i le tofa Ga Sakaria e faamuta lona tofi pulenuu ina ua taumafai le nuu e poloka le alatele ia lē mafai ai e leoleo ona faatino le latou galuega o le leoina o le fanua ae se‘i faatino le galuega a fuafanua o le fuaina o le sefulu eka mo le falemai faaitumalo.
O Magiagi na faatea lo latou pulenuu le afioga Tuiono Keni, ae na toe sui le iuga a le kapeneta ma toe faaauau ina ua mae‘a se feiloaiga a le nuu ma le Palemia ma malilie ai o le a faamita loa fale o aiga i le eletise e totogi muamua.
Peitai na foi le nuu i fanua ma tulai mai ai se feeseeseaiga i finagalo ona e faapea e lē o le finagalo lea na autasi i ai a o lei feiloai ma le Palemia. O loo tumau le teena o le mita o le eletise e totogi muamua ma o le pulenuu sa tu malosi i le lagolagoina o lea finagalo o se vaega o matai, ae o nisi matai ua latou talia le cashpower poo le eletise totogi muamua.
Na saunoa le Minisita o le mafuaaga lea na toe faia ai loa le isi faaiuga a le kapeneta e faamuta le tofi o Magiagi. O loo tutumau afioaga nei e lua o Magiagi ma Satapuala e lē suia ai lo latou lagolagoina pea o ia matai e tauaveina tofi a le malo.
Peitai na saunoa le minisita o le finagalo lava lea o matai o ia afioaga, ae o le itu i faamanuiaga tau tupe poo totogi e lē o toe maua. “Atonu e iai se aso toe maua se feiloaiga ma nei afioaga ona toe maua ai lea o se laolao e faatulaga lelei ai ni tofi fou mo Magiagi ma Satapuala, ae o le taimi nei e lē o toe maua se fesootaiga ma alii ma faipule”, na saunoa ai le minisita.
