O le alii pule o le ofisa malaga o le K & M Travels, Sanele poo Katie Moananu, lea sa nofo taofia i le toese i ona moliaga e 31, ua toe tatala nei i tua e tālia ai le toe valaauina o ia moliaga faasaga ia te ia.
E 30 moliaga o le gaoi a o avea ma tagata faigaluega ma le moliaga e tasi o le taufaasese ua faia e leoleo faasaga i lea alii ma e lei tuuina i ai sana tali i ia moliaga uma.
Ta‘ua e lē ua molia, e leai sona tetee i tupe sa ia faaaogāina, o pasese na totogi atu o tagata ae peitai e lei mafai ona tuu aloaia atu sana tali i ia moliaga uma ona sa talosaga mo sana loia ma ua toe tolopo ai loa i le aso 21 o le masina nei lea mataupu.
O tuutuuga o loo tatala ai i tua lea alii, e aofia ai le taofia o ona pepa malaga i le ofisa o le resitala i le Faamasinoga faatasi ai ma le saini i le ofisa o Leoleo i Aso Lua o vaiaso taitasi.
Ua tapunia lea ofisa malaga i le taimi nei ma o loo faaauau pea suesuega a le Matagaluega o Leoleo e tusa o soligatulafono ua tuua‘ia le faatino e lea alii pule ma e toatele le mamalu o le atunuu o loo finau le Ofisa o Leoleo ua aafia ai.
O se isi faamatalaga o lenei mataupu, e aofia ai nisi sa taumafai avanoa mo galuega faavaitaimi i Niu Sila ma Ausetalia ua faaletonu o latou pepa malaga faatasi ai ma le leiloloa o o latou tusifolau.
Sa faaoo atu foi se tagi a se tasi o tina sa agai i lea ofisa malaga mo ona pepa malaga e alu ai i Ausetalia, ae peitai ua faaaogā le tupe ua mae‘a ona totogi o lona pasese ae leai ni pepa ua faagaioi.
E silia ma le $1000 (tala) le tupe a lea tina sa ia totogi mo le faagaioiga o ona pepa malaga ma e leai se vaega tupe o lea tupe na toe totogi ane, ma o lea mataupu o loo aofia uma i moliaga e 30 o le gaoi a o avea ma tagata faigaluega ua aofia i totonu o le ripoti a Leoleo.
Faaalia e le Sui Sooupu o le Matagaluega o Leoleo, Leaupepe Fatu Pula, o le tele o tagi na faaoo atu i le Matagaluega, o tagata ua faapea mai e lei faatinoa faatasi se galuega a le Ofisa malaga o le K & M Travels ia latou talosaga e pei ona totogi ai le tupe mo talosaga poo visa aemaise o le totogi mo le auaunaga a le Ofisa Malaga lea i le faatinoga o o latou pepa malaga. O lea la ua toe tagi le toatele e toe totogi atu a latou seleni.
Faaalia e lē ua molia, e leai sona tetee i moliaga ua molia ai o ia. Peitai e lei faamauina aloaia lea faamatalaga ona o lea ua tuu atu i le loia a lenei alii na te momoli aloaia se tali a Sanele Moananu i moliaga nei e 31 ua faia faasaga ia te ia.
O le alii loia ia Alex Su‘a, lea na ta‘ua e lē ua molia o le a tulai e fesoasoani i ana mataupu. O le tala mulimuli lava o le suesuega lenei na ta‘ua ai e le Ofisa o Leoleo, e tai oo lava i le $400,000 (tala) se aofaiga tupe ua aafia ai.
O le toatele foi na talosaga ma totogi tupe i lea ofisa malaga, o aulotu ma autalavou ma e toatele lava la i latou sa iai le faamoemoe e faatino e lenei ofisa malaga o latou pepa malaga ae ua leai ma se pepa o faatautaia e pei ona iai tagi nei, ma na o latou ta‘ua foi e fai o le leai o ni pepa malaga ua faia, ae ua tau saili tusifolau e toe faafoi atu.
O lea la ua ave uma i le vaavaaiga a Leoleo tusifolau o i latou ua aafia ai i ia feutagaiga ma ua faalauiloa foi e tatau ona agai ane i le ofisa o leoleo i latou e oo mai i le taimi lenei o saili pea ia avanoa auā le toe faafoi ane o o latou tusi folau.
