Ua teena e le Ofisa o le Palemia se feiloaiga na faalauiloa i le amataga o le vaiaso e le Ofisa Malaga o le K&M Travels i luga o le Televise Tasi.
O lea feiloaiga ua faalauiloa ai e le alii o Sanele Moananu lea e valaau e le toatele o Katie Moananu, ua avatu le ioega a le Malo o Samoa faapea le Malo o Ausetalia, o lana ofisa malaga le ofisa e tasi ua taulai i ai le faatinoga o pepa ma talosaga a soo se tasi poo soo se vaega o loo iai se fuafuaga ma se manaoga ina ia agai i Ausetalia i avanoa faigaluega faavaitaimi, auā le tauina o fua o fualaau ‘aina i setete eseese i lea atunuu.
O le faamatalaga a le Ofisa o le Palemia i le vaega o nafa tonu ma le faatautaiga o pepa malaga ma le agai atu o tagata Samoa mo avanoa faavaitaimi e galulue ai i fafo, e lei tatalaina galuega mo le agai atu o nisi e fia maua avanoa faigaluega faavaitaimi i Ausetalia.
O se vaitaimi o le ogatotonu o le tausaga faato‘ā amata ai loa ona a faatautaia talosaga ma faamautu ai i latou o le a agai atu i Ausetalia.
O faasalalauga ua faia e le K&M Travels, na ta‘ua e le Ofisa o Galuega faavaitaimi i le Matagaluega lea a le Palemia, e lē o iai se fesootaiga ma le faatinoga o a latou galuega aua avanoa faavaitaimi nei mo Ausetalia, ona o lea faato‘ā tau amata lea faamoemoe.
“Ae e leai ma se galuega ua amata o lena polokalame”, o le faamatalaga lea.
O le faaaliga faalauiloa ua tuuina mai e le Ofisa o le K&M Travels ua ta‘ua ai ua na o le $10 ma le tusifolau e avatu e le tagata o loo fia malaga atu i Ausetalia mo ia avanoa ma o loo faatali lava le taimi e amata ai loa ona faatino pepa mo ia avanoa faigaluega ae o lea ua iai suafa o i latou ia ua taofia mo lea faamoemoe.
I totonu o aso e lua na manino ai lava le toatele na oo atu mo ia avanoa e fia taofia ma e oo atu i le to‘a 30 tagata na faamauina suafa ua taofia o latou avanoa nei. O ni tuutuuga ma aiaiga e faaeteete i ai le Ofisa o loo nafa ma le auina atu o tagata i fafo mo avanoa faigaluega lē tumau nei, auā e lē o faatautaia i le taimi nei avanoa ma e ono tulai mai ai ni faaletonu i le lumanai pe a lē manuia talosaga nei.
Sa faapea foi ona fesiligia le feiloaiga lea ua agiga i luga o le ea, lea na faaalia ai i se pepa faalauiloa e le Ofisa Malaga lenei ua avatu ai le faatagaga i lana kamupani e avea ai ma ofisa malaga e tasi i Samoa o le a fesootai ma tagata e fia talosaga mo avanoa faigaluega nei i Ausetalia ma ua avatu le faamaoniga e le Malo o Samoa ma le Malo o Ausetalia.
O le faamatalaga a le Ofisa o Ausetalia ona pau lava le latou galuega i le polokalame fesoasoani lenei, o le sainigalima lea na faatautaia ma le Malo o Samoa mo le aloaia ai o le polokalame lenei e auina atu ai tagata mo avanoa faigaluega ia, peitai e lē iai se malosiaga o Ausetalia e faia ai ni filifiliga poo ai e agai i ia avanoa ae o ai e lē talia.
O tuutuuga uma foi o le faatinoga o pepa mo le agai atu o tagata Samoa i Ausetalia ua tuu atu lava i le malo o Samoa ae o pemita e agai atu lava i lo latou ofisa.
