O le mae‘a ona suesueina molimau o le tagi tau palota mai le itumalo o Anoamaa i Sasa‘e lea ua mae‘a fofogaina le faaiuga ua faamaonia ai moliaga o faiaga faaalatua a le sui faipule o Ala‘iasa Filipo Schwarts Hunt faapea moliaga ma tuuaiga o lē na tagi Moefaauo Lufilufi, ua faailoa ai ma se faanoanoaga o le faamasinoga i tiute ma matafaioi o Pulenuu.
O se tasi o moliaga ua faamaonia o lē sa avea ma faipule o Anoamaa i Sasa’e o loo faaalia ai le tuuina atu e le tausi o Moefaauo Lufilufi, o Maria Peleise o le $100 tala i le Pulenuu o Manunu le susuga Manutufatufa Maugatai ma le faamoemoe e tuuina atu le lagolago mo lē na faauluina le tagi o se sui tauva i le palota na faia i le aso 4 o Mati 2011.
O le silasila a le faamasinoga o Pulenuu o loo umia tofi tāua o le Malo o loo pito tasi le latou tiute i le lagolago i sui tauva o faiga palota ma ua lē faia ai lo latou tiute o le tutusa o itu uma i le faatinoga o lana matafaioi, ma e lē o se faataitaiga lelei lea mo isi aemaise tupulaga faia‘e o se nuu ma se afioaga.
O se fautuaga malosi a le faamasinoga o le a tuuina atu i le Fofoga Fetalai, e silasila e tagofia e se Komiti Faapalemene le mataupu ma ia ta vavae ai tiute o se tagata e umia le tofi Pulenuu ma le aafia i se taumafaiga a se sui tauva o le palota.
O se iloiloga foi a sea komiti faapalemene o le a sagatonu ai le faamamalu o tiute faapulenuu ma ia maioio ai le tofi pulenuu ma le tulaga o se tagata palota e auai i le faiga filifiliga e sailia ai tofi o itumalo i le Palemene.
E pei ona silafia e le au faitau o se teuteuga i le tulafono o faigapalota ua ave ai le pule toatasi i le Pulenuu na te faamaonia ai le monotaga a se matai e fia tauva i le palota, o se isi lea vaega sa faitioina e le vaega faaupufai o le Tautua Samoa, ina ua aliali mai ni tulaga faaletonu i nisi o a latou sui faatutu. Na aliali mai foi ni taumafaiga a nisi sui tauva e faatafao le pulenuu i se nofoaga mamao ese, a o taumafai le sui tauva e saili mo le sainia o lana pepa faamaonia.
O nisi ia o tulaga e manatu nisi o faipule o le Tautua Samoa ua tatau i le Palemene ona toe soalaupule lelei ai lea vaega o le tulafono, ina ia taofia ai le toe aliali mai o ni faaletonu i taumafaiga a sui e fia taufetuli i faigapalota a le atunuu. E iai le talitonuga o se isi lea vaega o le a silasila i ai le Komisi suesue tau faigapaplota o le a toe iloiloina le tulafono o faigapalota.
