“O tou silasila mai o o‘u ma’i, o lea ou te malosi atoatoa”
O le toe umia e le Palemia o le tofi minisita o tupe, faaopoopo i ai ma ona tiute faataitai o le Malo ua popole ai le Itu agai ona o le tulaga i le matua o le soifua o le Palemia ma lona malosi e lē o toe tutusa.
O le mau a le Itu agai e tatau ona silasila le Palemia e tuu ese nisi tiute faaminisita o loo ia tauaveina ona o loo toatele faipule agavaa o lana vaega faaupufai. Peitai ina ua fesiligia le taitai o le Malo, na faaalia e le susuga Tuilaepa Lupesoliai Sailele Malielegaoi i tusitala, o lona malosi o loo atoatoa, ma e leai foi se gasegase o aafia ai.
“Ua tou silafia e ma‘i suka uma faipule o le Itu agai toe ma‘i gugu, a o a‘u ou te lē maua i na gasegase, lona uiga e leai lava se mea e popole ai fua le Itu agai”.
O se vaega lea o lona finagalo ma ia faaalia ai o le toe avea ma Minisita o Tupe, e lē o se mea mamafa auā sa tele tausaga sa galue ai i le matagaluega o le tupe a le Malo seia oo ina pale i le tofi faipule ma avea ai ma minisita o tupe mo ni tausaga se tele.
Faaalia e Tuilaepa o le popole vale o le Itu agai e lē faavaea ona e leai ma se isi o latou na tauaveina muamua se tofi minisita o le tupe. O le tasi o feiloaiga a le Itu agai ma tusitala ma le aufaasalalau na faaalia ai e lo latou taitai le afioga Palusalue Faapo II, ua leai se faatuatuaga o le Palemia i lana vaega faaupufai fua ina ia toe see ane e tauave le tofi minisita o tupe o se matagaluega e tāua tele. O le finagalo foi o Palusalue e faavae i saunoaga fai pea a le Palemia e na te ta‘ua ai lava o faipule uma o le HRPP e agavaa ma o laui‘a foi.
O le tasi lava lea o mataupu o loo mimilo ai lagona o nisi faipule o le itu a le Malo, ona o le faamavae o le afioga Faumuina ma le Kapeneta sa umia le tofi minisita o le Tupe ae filifilia se isi minisita fou e pei ona seei ai le faipule o Satupaitea.
Ua lē ogatasi ai ma le talitonuga o le a iai se isi e tauaveina le tupe e ese mai le tofiga taitai o le Malo poo le Palemia o loo seei ai le faipule o Lepa. Talu ona sii gasegase atu i Niu Sila le Palemia i nai masina e lei mamao atu ona o se afaina o se tasi o ona aao i se fao, e lē o toe malolo le Itu agai i le finauina o le tatau ona silasila Tuilaepa i lona soifua maloloina ina ia fuafua lelei i ai ona tiute fai faataitai o le Malo ma lana vaega faaupufai o le HRPP.
