O le faatulai mai o teuteuga fou o le Tulafono o Faigapalota 1963 ma fuafua ai le faavaeina o itumalo tu taulaga lea ua ta‘ua o urban seats, ua iloa ai i se sailiiliga na faia mo se tatou lipoti, le toatele o i latou ua faaalia lo latou lagolagoina o nei nofoa fou o le Palemene o Samoa. Ua iloa ai foi e toatele nisi o matai mai isi nuu ma itumalo o le atunuu o loo ua faamautu i le taulaga i le Vaimauga ma Faleata i fanua umia saoloto ma fanua lisi o le malo ua sauni e tauva mo nofoa o itumalo tu taulaga. O loo taoto nei i le Palemene e lei pasia o loo aiaia ai le mafai e soo se tasi o umia se suafa matai mai se isi nuu ma se afioaga o le atunuu ona tauva mo ia itumalo e lua pe afai ua faamaonia ua nofomau ai e lē o toe alala i se afioaga ma se itumalo mavae.
O lona uiga afai o oe o loo umia le suafa Pa‘uesi (mo se faataitaiga) mai se nuu i Savaii ae ua e alala mau ma lou aiga i se fanua lisi o le Malo poo se eleele umia saoloto i se pitonuu ma se nuu e lē o lavea i ni faalupega o se nuu mavae i le taulaga i Apia e faasino lea i itumalo o le Vaimauga ma Faleata, ua avanoa ona e avea ma tagata palota poo se sui tauva mo ia nofoa e lua.
Faaalia e se matai o se afioaga mavae i le itumalo o Faleata, o lea faatoa sa‘o le faiga tonu e fai ai le tulaga sa iai muamua, o le lavea i totonu o ia itumalo ma pitonuu ma nuu e lē o ni nuu mavae ona ua fai e tagata o loo nonofo ai le faaiuga o se tofi faipule, ae matamata fua nuu mavae o loo faasino i ai se sui tauva o loo ia umia se suafa matai o se afioga o lea itumalo.
O le vaevaeina o le itumalo Faleata ma le Vaimauga, o le a na o tagata ai o nonofo ma alala i nuu mavae o le a lesitala mo le lisi palota o ia itumalo, ae lē toe lesitala ai ma tagata o loo nonofo lisi i fanua o le Malo ma i latou ua faatau o latou eleele umia saoloto.
E toatele aiga mai nuu mamao i tua i Upolu ma Savaii ua faatau o latou fasi fanua i totonu o ia itumalo, ma agai mai i ai ma nisi o o latou auaiga ma faamautu ai.
O se faataitaiga o Vaitele fou i fanua o loo iai ua tumu i tagata eseese mai vaega eseese o Samoa o loo mau ai. E faapena foi i le Vaimauga, ma o i latou tonu ia o le a faasino i ai nofoa o itumalo tu taulaga.
E aliali mai la i sailiiliga na faia e tusa o se lagona o i latou o loo faasino tonu i ai lea teuteuga o le tulafono o faigapalota, o se tulaga faigata o le a iai le filifiliga o ni faaipule muamua o le a tauaveina ia tofi faipule o le Palemene i le toatele o i latou o loo foufou e avea ma sui tauva.
O Mati o le tausaga e 2016 le isi palota tele a le atunuu lea o le a faatino ai ma lea filifiliga pe a toe sailia ni sui o le fono aoao faitulafono a le atunuu.
O le isi tulaga mataina i lea palota tele o le filifilia ai o ni nofoa se lima mo le ituvai o tamaitai, lea afai e suipi mai ni sui tauva tamaitai i le aofaiga o palota latou te maua mai itumalo o le a tauva ai, o le a lē faaaogāina teuteuga o le faavae ua faaopoopo ai nofoa o le Palemene ona o tofi faipule e lima mo tamaitai o le atunuu, ae faatoa faaaogā le teuteuga pe a lē manuia se sui tauva tamaitai mai le filifiliga a se itumalo, ma o le a faaaogā ai le pasene o palota uma na maua i se filifiliga a se itumalo faafaipule.
