E lē o lava le sao o tamaitai i upufai o malo Afioga Fiame Naomi Mataafa

O le aso lona tolu o le Fonotaga Faapalemene a Taitai Faaupufai a le Pasefika e pei ona usuia i totonu o le Maota Fono o le Palemene a Niu Sila, na tatala ai lauga o lea aso i se saunoaga mai le tamaitai minisita sinia o Samoa mo le Matagaluega o Faamasinoga, le Afioga Fiame Naomi Mataafa. Sa agai le lauga a Fiame i le tāua o le iai o se sao tele o tamaitai i totonu o mataupu faapalemene poo se sao tutusa atu i le itupa o alii. Saunoa Fiame, e tutusa lava le tele o palemene a atunuu o le Pasefika, e tau lē o iai se sao o tamaitai i totonu o upufai o malo.
Saunoa Fiame, o matafaioi a se taitai, o mea e tatau ona tutusa ai le faatinoga o galuega a itupa uma e lua o alii ma tamaitai, e pei o le silasila i mataupu o loo fou ma agai i ai manatu o tagata ma tiutefai.
Sa ta‘ua foi e Fiame o loo faagasolo nei le tapenaina o le suiga i le tulafono faavae i le filifiliga o faipule a le maota fono a Samoa, ina ia maua ai le avanoa mo tamaitai, ia lē itiiti ifo i le sefulu pasene, ma a faaliliu i nofoa o le Palemene, ia lē itiiti ifo i le toalima ni sui tamaitai o le Palemene.
O le faiga la o le filifiliga e faapea, afai e uma ane le faiga palota ae ua iai ni tamaitai se toalima pe sili atu, ia ona alu ai lea faapea. Ae afai e uma ane le faiga palota ae matuā leai lava se sui tamaitai, ona faatino loa lea o le tulafono, e saili mai ni sui tamaitai se toalima mai tamaitai sa tauva ma lei faamanuiaina, ae o loo latalata i luga a latou palota na maua.
O se faataitaiga e pei o le tulaga o loo iai nei le Palemene, e na o le toalua sui tamaitai i le taimi nei, lona uiga e tatau ona toe saili mai nisi tamaitai se toatolu o latalata i luga a latou palota na maua, e faaatoa ai le toalima lea e moomia i totonu o le Palemene e tusa ai ma le tulafono faavae fou o le a iai.
Saunoa Fiame, ua faamaonia lava le telē o le eseesega i palemene o loo toatele ai ni sui faipule tamaitai, pe a faatusatusa atu i palemene e tau leai pe matuā leai lava ni sui faipule tamaitai.
Sa ia toe tomanatu ma ta‘ua ai le vaitaimi foi ina ua faatoa ofi mai o se sui faipule i le Palemene, sa talavou ma o se tamaitai nofofua, sa ia matauina ai i lena vaitaimi i nisi o tamaitai sa iai i le Palemene, e matutua mamao atu nai lo ia, e matuā malolosi lava nei tamaitai i le faatinoina o o la tiute faapalemene, ma sa lei foi lava i le tulai atu e faafeto‘ai le itupa o alii pe a oo i taimi o felafolafoaiga a le Palemene.
O le manatu la lena sa tele ina agai i ai le lauga a le Afioga Fiame, sa ia faailoa ai i le auusufono, e manaomia lava ona maua uma e alii ma tamaitai avanoa tutusa, o aiā tutusa ma mea uma e faatāua ia tutusapau ai ma alii.
Saunoa Fiame, e manaomia ona galulue malolosi atunuu uma o le Pasefika e taofia faiga sauā agai i tamaitai, o uiga faasinosinolima ma uiga faailogatagata ona o le ituaiga o le tagata, ae tatau ona tutusa i mea uma, i le soifuaga tau i le vafealoai, i mataupu faapolokiki ma atinae tau le tamaoaiga i soo se vaega o le Pasefika.
Sa faaalia ai foi e le tamaitai minisita i le auusufono, se ata tifaga puupuu, “E Au le Ina‘ilau a Tamaitai.” O lenei ata tifaga puupuu o loo faamatala lava i le gagana Samoa ae iai ona subtitles faaperetania.
O loo faaleo ai lagona o i latou e talitonu o aiā tatau a tamaitai sa avea o se vaega o le aganuu masani a Samoa, ma i latou e talitonu, e lē talafeagai le faatinoina o aiā tatau a tamaitai e pei ona manatu ai nei, pe a tuu atu i le talitonuga faakerisiano.
O le itu lea sa matele i ai le saunoaga atoa a le tamaitai minisita i lea aso, o le faatāua o le aiā tatau a tamaitai, e pei foi ona telē se sao lelei e latou te faia mo atinae ma le agai i luma o faiga malo lelei, pe afai e latou te maua se avanoa tutusa e faia ai faapei ona faia foi e alii.