Ua fesiligia le maualuga o le lakapi a Niu Sila

I le faagasologa o le taamilosaga o le Super 15 o loo faaauauina pea i le taimi nei, ua tele ina toe tulai mai ai ni fesili tetele i le sao o le lakapi a Niu Sila i lenei taamilosaga e pei ona sa uluai faafaileleina atu i totonu o Niu Sila nei.
E toatele nisi o loo tulimataia le faagasologa o lenei taamilosaga aemaise ai o lea ua agai mai i le ogatotonu o le taamilosaga o loo iai nei, ae manatu nisi ua pei ua tau mou atu le lelei o le lakapi a Niu Sila pe a silasila i le tulaga o loo iai ‘au a Niu Sila i totonu o le taamilosaga i le taimi nei.
E foliga mai e lē o iai lava se ‘au a Niu Sila o maitauina le tumau ai pea le atoatoa i taimi uma e pei o le tele o ‘au i taamilosaga sa sau ai. O le faatinoga o le lakapi i le taimi nei ua tele ma anoanoai vaega o le taaloga e lē gata ua lē o toe vaaia i lona faatinoga e matagofie i le vaavaai, ae ua tulai mai foi ua na o se auala lelei e saili ai le faatoilaloina o le isi ‘au.
Ua televave le faatinoga ma fesuisuia‘i le faiga pau le mea ua molimauina i le taaloga i le taimi nei, ua leai le lelei lea sa masani ai Niu Sila i le fatinoga o le taaloga. E oo lava foi i tama taaalo ua tele ina vave lavevea le tele o isi tama taaalo i taamilosaga, o isi ua vave ona malolo e lei mae‘a le taamilosaga, poo le aafia foi i ni manu‘aga mai taaloga. O le faagasologa o le polo i le laina i luma faapea foi le laina i tua, ua matuā sui lava i le vaavaai mamao atu a le autapuai.
Afai ae atamamai Niu Sila e tulimataia le faagasologa o le taamilosaga o loo faia nei, ua tatau ai ona vave sue se auala e toe faafoi ai le lakapi a Niu Sila i le maualuga sa lē mafai e se atunuu ona ausia, o le fesuiaga o kalapu mai lea taimi i lea taimi, o le fegasoloai o tama taaalo mai lea kalapu i le la kalapu, ma metotia a faiaoga o nisi sa taaalo lakapi faapea foi nisi e lei lakapi lava i le olaga ae toaga e faitau tusi ma saili metotia e faatoilaloina ai ‘au i taimi o taaaloga, faatasi ai ma le tulaga matutua ua oo i ai tama taaalo o loo iai nei.
E aogā le Super 15 e toe iloilo ai manu‘a o le lakapi a Niu Sila ua tele ina mou atu le tulaga sa tele ina fiafia ai tagata e maimoa i malae poo le matamata ai foi i le televise. Masalo a e toe matamata e soo se taaloga lava a ‘au a Niu Sila, tulimatai le faatinoga e le laina i luma ma le laina i tua, o iinā e te ofo tele ai i le vave ona solomuli o le lakapi e faamemelo tele i ai Niu Sila, ma e umi foi se taimi o tulaga muamua ai pea Niu Sila i faatulagaga o atunuu o loo faatinoa le lakapi.
Talosia ia vave ona toe foi le malosi o le lakapi a Niu Sila i le tulaga maualuga sa iai, ma o loo faamauina ai pea i atunuu tetele o loo latou faafaileleina lenei taaloga.