O le alo atu i le tauvaga pese tele ua fuafua i le Aso Sa, aso 25 o Aukuso, sa fesiligia ai sui o aufaipese i le fonotaga na usuia i le po o le Aso Toonai 10 o Aukuso, o se mitamitaga i le maualuga o le tapulaa o le Kerisiano ma lana auaunaga i le Atua e ala i viiviiga o lo tatou Matai, e ala i le saunoaga, “E lē tāua le tauva i le faaailoga ae ia maualuga pea le viiga o le Atua”. Na amata mai le tatalaina o avanoa i le masina o Me mo aufaipese e fia faaulu mai, lea o loo faatautaia e le leitio a le Penina o Asuisui ae lagolago faaailoga e le faletaavale a le Primoz Motors i Underwood.
Ua iite fanua a lalo ma ua toe a ose aga ona taunuu lea o le faamoemoe, ae foliga mai o loo talisapaia e le tele o tupu ma tamalii o loo tautua le atunuu i lenei itu e ala i pisinisi le tele o fuafuaga o lea afiafi ae sili na faafetai i aufaipese o loo alo atu e fai sao ma lagiina viiga o le Atua.
Ua faamoemoe o le faatulagaina o le polokalame e tatau ona nofoia le nofoaga i le ‘afa o le lima i le afiafi (5:30pm) ona sauni lea i le sauniga lotu puupuu i le ta o le 6 ma faagasolo ai loa polokalame.
O le Fuesaina Family e tovāina le tele o aufaipese faatasi ma autalavou SISDAC a Inala ma Ipswich faapea le tamaitai o Rita Muliaga, o le aufaipese a alo o Terry Fauea ma nisi lava autalavou.
Ua alo atu foi le Uncle Sam’s Takeaway (Poulava Sam & Lorna Matautia) faatasi ma le Digicel (Chris Tupu Tuiā) i sina taumafataga paleni lelei, e lē gata e teu ai le fika ae sili ona faamalosi ai le tino.
E tele foi ni faaailoga tufa fua i lea afiafi pe a fai e te laki i ni fesili e tuuina atu e ala i le lagolago mai a le aufaipisinisi.
O faamasino e malaga mai le toatasi mai Aukilani i Niu Sila ma le toatasi e malaga mai Melepone.
E fitu aufaipese ua sauni mo lea afiafi; o le a tatalaina e le aufaipese a le (1) Matagaluega Metotisi Faasinoti a Logan City; (2) EFKS Southwest Brisbane i Willawong; (3) Sunny Bank Uniting Church; (4) Goodna Uniting Church; (5) Matagaluega Metotisi Faasinoti a Algester; (6) Samoa sailimalo Ipswich; (7) Uesiliana Metotisi Ausetalia a Inala.
Faasilasilaga Tāua:
Mo le tauvaga pese ale leitio Penina o Asuisui 1197am, lagolagoina e le Primoz Motors ma le aufaipisinisi o le a tuusa‘o foi i luga o le ea faasalalauga o lea afiafi.
Aso: Aso Sa, 25 Aukuso 2013
Taimi: 6pm-12am
Nofoaga: 204 Sherbrooke Road, Willawong
(E le mamao lava ma le falesa EFKS Southwest Brisbane a le susuga ia Rev Elder Taua‘aga & Senerita Mata‘afa)
Telefoni mo fesootaiga: 0432 371 127
