Faamavae Rev Alatise Apineru ma Canberra

Na matagofie ma faamomoiloto le sauniga faaiu a le Ekalesia Metotisi i Quenbeyan i Canberra ma lo latou faafeagaiga ia Rev Alatise Letelemaana Apineru ma le faletua ia Toaitiiti lea ua taualuga foi lo la tofi i le laumua.
E pei ona silafia o le Ekalesia Metotisi e fesuisuiai atunuu ma afioga e siitia i ai auauna a le Atua ma o le itulau fou lenei o le savalia e Rev Alatise Apineru ma le faletua.
E ui o le valavala o Sini ma Canberra i kilomita sa vaaia lava le opogi o le Ekalesia Metotisi i Ekalesia Metotisi i Sini nei ma o se tasi lea o mafutaga mausali i Ausetalia nei. O malo asiasi mai foi i Ausetalia ma Canberra faapea i latou o aotauina e tatala lava i ai le Ekalesia i Quenbeyan seia mae‘a foi ma toe taliu.
O se nofoaga foi sa avea ma malu i itu ma aganuu tauave a si o tatou atunuu ma silasila i ai fanau o loo soifua i Ausetalia nei i mea masani o le faasamoa.
O se tasi lenei Polokalame ua sauni i ai le Fono aoao a Tagata Samoa i Sini o le faaolaola o le gagana ma Aganuu Faasamoa i tupulaga laiti. I totonu o Canberra ua iai foi le tele o Ekalesia e pei o le Katoliko, Mamona, AOG ma le EFKS ma o loo faaolaola ai lava le gagana Samoa e ala i le faitauina o le Tusi Paia.
E pei ona vaaia i le sailiga siamupini o le Supa XV na manumalo ai le Chiefs, e toafitu tama Samoa na tatalo mo le Brumbies mai Canberra ma o nisi o i latou nei o loo alala nei i Canberra ma lolotu i nei Ekalesia.
O le alii o Christian Lealiifano lea na maua uma ‘ai o le Brumbies i le suega siamupini e aulotu ia Rev Alatise Letelemaana Apineru.
Na faaalia e le tamaitai o Arieta Sauiluma Duggan, “o Christian Lealiifano o le toaga ia i le lotu ma o se sui faamoemoeina o le autalavou. O se tagata tausaafia ma faamaopoopo i mea e fai a le aulotu.”
E talitonu o se molimau foi lea o le a faasoa atu e Rev Alatise Apineru i le lumanai i isi Ekalesia e uiga i tamafanau i Canberra e fai ma pine faamau o le galuega.