E fasi leaga le isi atalii ae tagi misia le isi atalii

O Ietitaia Tapumanaia, ua silafia e le toatele i Samoa i lona tulai mai e tauave le Asosi o Taulasea Samoa i le tausaga na tea nei. O se tofiga e lē o toe umia e lea alii peitai ua salalau nei faamatalaga e faatatau i lenei alii i se itu lē lelei.
O le lua vaiaso talu ai na faatotope atu ai le taavale a leoleo i se fale i Leonē ua logo atu e se tasi i le telefoni o loo fasi leaga lava e lenei alii sona atalii pepe e lei leva ona o la vaetama ma lona toalua.
E na o le fitu masina le matua o le pepe. Sa fesootai foi se tasi i le taimi lava lea i le Faalapotopotoga o le Toomaga mo ē Puapuagatia, ma faapea ai loa ona agai foi lea faalapotopotoga i le fale.
O le taunuu atu o i latou nei i le fale, na maua ai le pepe lea ua faaoolima i ai lenei alii ma na ta‘ua e nisi na velo e lenei alii le pepe i le puipui o le fale ma o se faiga ua maofa ai le toatele ona o le laitiiti o le pepe ua fai i ai lenei faiga lē alofa.
O le Toomaga mo ē Puapuagatia na agai sa‘o lava ma aveese le pepe ae ave e leoleo lenei alii ma taofia i le vaaiga a le tulafono seia oo i le taimi e tulai ai i ona moliaga.
O le moliaga na faia e leoleo o le faaoo manu‘a ma o le amataga o le vaiaso na tea nei na valaau ai lenei mataupu ma na ioe ai lava Ietitaia i lona moliaga ae tapa atu le Faamasinoga poo fea le tala atoa o le moliaga ae fai mai le sui o le Matagaluega o Leoleo, e leai se lipoti o ia i latou i le taimi lea. Ae ua faamautu le moliaga o le faaoo manu‘a.
Sa tapa foi e le Faamasinoga e ala i le tamaitai Faamasino o Ida Malosi, poo fea le lipoti a le falemai aemaise le fomai na tau atu i ai le tamaitiiti lenei mo se siaki ma togafitiga ae tali leoleo e lē o ia i latou se lipoti faapea.
Na toe tolopo lea o le mataupu i le faaiuga o le vaiaso mo lipoti ua fia maua e le Faamasinoga.
Sa toe tulai la le alii lenei i luma o Faamasino Malosi i le Aso Tofi peitai e lei iai se tasi o molimau malosi a Leoleo e faamaopoopo ai se lipoti lea ua masalomia ua leiloa o lenei mataupu. E lei maua atu foi se lipoti a le falemai lea na manaomia e le tamaitai Faamasino ma toe tolopo ai loa i le vaiaso lenei le mataupu.
A o lei mae‘a le faamasinoga na talosaga loia a lenei alii e fia agai i lona aiga e faatali ai le lauina o lona iuga auā ua ioe i le mataupu. O le faamatalaga a lenei alii, ua manatu lona atalii e 17 tausaga ia te ia.
E lei talia e le tamaitai Faamasino ia Ida Malosi lea talosaga ma faapea mai o le vaiaso lenei ua toe tolopo ai le mataupu, e nofo taofia pea lea alii i le Faamasinoga seia oo i le taimi e lau ai lona iuga.
Na vaaia le faanoanoa o le aiga o lenei alii i fafo i le Fale Faamasino ina ua mae‘a le mataupu ae alu ane Ietitaia e feiloai i lona atalii aemaise sui o lona aiga sa auai atu i le Faamasinoga ma le tina o le aiga.
Ae o le pepe o loo i lalo pea o le vaaiga a le Toomaga mo ē Puapuagatia i le taimi lenei seia mae‘a le Faamasinoga poo fea tonu o le a ave i ai le tamaitiiti. E lē o iai ni tulafono i Samoa e ave ai e faalapotopotoga tuma‘oti poo le malo foi fanau e aafia i sauaga.
Ae talu ona faavae le Toomaga mo ē Puapuagatia, ua toatele fanau ua puapuagatia faapea ua aveese mai i le vaaiga a latou mātua pe afai o mātua ia e faia ia sauaga ma o nisi o pepe, ua toe avatu i isi sui o aiga e oo atu ma talosaga lo latou tausia o fanau nei poo nisi foi o tagata i Samoa lava ia o loo iai le manaoga e ave pepe ua aafia i sauaga.