E auau le tava‘e i ona fulu, e naunau le matua Samoa ina ia tauleleia o tatou tagata

E oo loa i tuufaatasiga o meafai a aoga poo se faalapotopotoga lava e filofilo ai se Samoa, e lē tuumāmāina foi pe faatauagavale o tatou lava tagata auā e auau lava le matua ia, ina ia fiafia lona alo ae sili ona tauleleia.
Ua lē gata i le va ma isi tamaiti ae o le fatu sili lea ona aogā e vaai i ai le tamaitiiti ma faaosofia ai le fia suesue ma fia galue atili pea auā le sueina o le poto ma le atamai.
O se tasi lenei o aoga e fai sina toatele o alo ma fanau Samoa o loo aooga ai, o le aoga ua igoa o le “Our Lady of the Sacred Heart School” i le nofoaga o Dara.
E ui lava ina eseese atunuu o loo faaaooga o latou alo ma fanau i lenei aoga peitai e lotogatasi lava nei mātua uma e ala lea i le lagolagoina o meafai ma faagaioiga i tausaga uma.
O le tele lava o mātua mai nei atunuu eseese, ua mausali tele le mafutaga vavalalata ma mātua Samoa, e faapena foi i alo ma fanau aoga e leai se faaletonu i le va o le isi ma le isi se‘i vaganā ai nai isi lava tamaiti e lē mafai lava ona tuuesea uiga matamuli ma le faailoga tagata na ola a‘e ai, ma e fuafua lava i le atunuu e sau ai ma le tupuaga foi na soifua a‘e ai.
O le sailiga seleni lenei a le Our Lady of the Sacred Heart School e ta‘i tolu tausaga ma faataunuuina. E molimauina foi le lagolago malosi o mātua uma lava o mafai ona a‘oa‘oina alo i lenei aoga.
E faatauina ai soo se taumafa, e kukaina ai foi le papakiu ma le tele o taumafa eseese, ma e vaaia le lolofi atu o tagata e faatau e lē gata o nuu tuaoi ae faapea foi tauaiga, uo ma ē masani ona o le fia lagolago lava o le isi uso i le isi uso.
O tausaga e lē faaitiitia pea le au faatau, ma o seleni uma e maua, e faamaopoopo ma tuuina atu e fesoasoani ai i meafai a le aoga faapea le tele o faagaioiga a o mafai ona iai se seleni faaagaga e le komiti a mātua eseese.
O lea faamoemoe sa faataunuina i le Aso Sa, aso 15 o Me na amataina mai le 10 i le taeao e oo atu i le 3 i le afiafi. E ui lava ina tele sauniuniga a mātua sa tapena, peitai e ta ane le tasi ua toeitiiti uma na alu le tele o taumafa, lelei foi se seleni sa tauaaoina.
O le susuga ia Matafeo Lio Samaila, o ia lea o le sifi kuka faamoemoeina ua lauiloa foi lana taleni i lenei aoga.