Avea lenei avanoa tāua e faafeiloai atu ai i le paia ma le mamalu o Samoa. I ou paia faaleatua, ou paia faalemalo, ma ou paia faaleatunuu.
Faafetai foi i lou taliaina o lenei tusitusiga i lou finagalo. O ni nai motugaafa e iai le faamoemoe o iai se aogā auā le manuia o o tatou tagata aemaise ekalesia o loo tatou auauna ai i le Atua.
E momoli atu lava le faamalo i susuga i faafeagaiga o loo asuina pea le vai o le ola i lea nuu ma lea afioaga i aso taitasi. Faamalo le fai o le faiva! Faamalo foi le taitaia o le lafu mamoe a le Atua.
E ioeina lava le faigata i le tele o taimi, ae pei lava o le upu e masani ai le muagagana, “o le mea e iai le loto e iai foi le auala e fai ai”. E iai nisi o taimi e matuā pogisa ai le mafaufau i faaiuga fai i totonu o ekalesia aemaise pe a feagai ma faigata, ae aumaia lava e le Atua lona sosia ina ia manuia ona tagata. Malo le onosai!
O loo faaauauina pea le tatou talanoaga i le tofiaina o taitai i totonu o le ekalesia. E mafai foi ona faaaogāina nei auala e filifilia ai taitai o faalapotoptoga ma pisinisi.
Peitai i lenei tusitusiga o loo faaautū i le taitai o Ekalesia.
Na ta‘ua i le vaiaso na tea nei le vaega lona ono i le filifilia o taitai. E tāua le filifiliina o taitai e totoa o latou loto.
E leai lava ma se tasi e fia mulimuli i se taitai e palaai. Se taitai e fefe e fai faaiuga faigata.
A silasila foi i le tele o kegi o loo iai nei, o le tagata lava e sili ona toa le loto, o le tagata foi lena e avea ma taitai.
I totonu o le galuega a le Atua, e tatau ona taitaia e le tagata ua valaauina e le Atua. O le vaega muamua lena, ae tatau ona iai le toa o le loto e feagai ai ma mea faigata.
Vaega lona fitu, o le Faaaloalo. E ese le tāua o le vaega lea i le soifua o tatou tagata Samoa. E lua vaega o le faaaloalo ou te fia ta‘ua. Muamua o le faaaloalo lea i tagata. Lona lua o le taitai e faaaloalo i ai tagata.
O le taitai e moomia e tatau ona ola faaaloalo ma pulea. E iloa lea i lana gagana tautala aemaise o ona uiga faaalia. E iai lava lo‘u talitonuga maumaututu o le faaaloalo o le finagalo lea o le Atua ae lē na o se aganuu faasamoa. E masani ona tatou fai mai o le faaaloalo o le aganuu lea e iloa ai le tagata Samoa. Manatua foi e lē na o Samoa e faaaloalo ona tagata, e faapea foi isi atunuu.
O le taitai e lē tatau ona amio paaa. E tatau ona tausaafia ona uiga. Ina o o‘u tupu a‘e o se tamaitiiti, e masani ona ou faalogo i o‘u mātua o fai le faauupuga ia i matou le fanau e faapea, “Ia iloa teu le va”.
O le va tapuia ia iloa e le taitai ona fai. Auā tusa poo le ā le poto ma le atamai, tusa foi poo le ā le lelei o le lauga ma le iloa o le Tusi Paia, ae a lē iloa teu le va ma tagata, o le a matuā faigata lava lana galuega faataitai. O le a lē amanaiaina o ia.
O le vaega lona lua o le faaaloalo e fia talanoa I ai, o le “faaaloalogia lea o le taitai e tagata”. O le faaaloalo e te maua ina ua e foaia. E pei o le alofa, e te maua pe a alofa atu.
O le faaaloalogia o le taitai e tagata e lē mafua ona o lou tofi, ae mafua ona o ou uiga. E iai sina faaaloalogia e tuuina atu e tagata ia te oe ona o le tofi.
Ae o le fesili, faamata e te maua pea lena faaaloalo pe afai ae aveesea le tofi mai ia te oe? O inā e iloa ai le tagata e faaaloalogia ona o ona uiga ma lona alofa, ma le tagata e maua le faaaloalo ona o lona tofi.
I se faaupuga lata mai e faamatala ai le faaaloalo. O le tagata e alofagia ma fiafia i ai tagata. O le taitai e alofagia, e mulimuli foi i ai tagata.
O se tasi itu o le faaaloalo e tatau foi ona silasila i ai pe a tofia ni taitai, o le vaai lea pe faaaloalogia ma amanaiaina lea tagata e lona aiga. Silasila i lana fanau poo ni tamaiti e iloa faaaloalo.
E tele nisi o itu e tatau ona tagai i ai i le tofiaina o taitai. Ua uma foi ona faataatia mai e le Tusi Paia vaega tāua ina ia mataituina.
O le tele o taimi e manatu māmā ai i tatou i le tagata e fetaui mo le galuega. Ae iai foi le taimi ua tatou manatu mamafa foi ma lē tuu avanoa i taitai o loo iai le agavaa e ui lava ina moto se‘i tulou le agavaa o loo iai, ae e iai pea le talitonuga e iai le taimi e matua ai le agavaa ma matagofie.
Ou te manatu i le tele o tupulaga talavou ua tatau ona tuu i ai le avanoa e avea ai i latou ma taitai.
I le tele o ekalesia pe sa‘o la‘u maitau, o loo iai le tupulaga 25-35 tausaga le matutua o loo lolotu ae leai ni vaega o loo faaaogāina ai o latou olaga e auauna ai pe avea ai ma taitai i totonu o le Ekalesia.
O le toatele o i latou nei a lē mafai ona maua lea avanoa i totonu o ekalesia ona latou vaavaai lea i isi ekalesia e mafai ona faaaogāina ai lo latou agavaa ma a‘oa‘oina ma faaaogāina ai i latou i tulaga tau taitai.
O la‘u talatalanoa i le toatele o fanau na soifua a‘e i Niu Sila ma Ausetalia poo atunuu i fafo, o lo latou lea lagona. E foliga mai e lē amanaiaina i latou.
E pau le taimi e amanaia ai i latou o taimi e fai ai faalavelave ma meafai a le ekalesia, ae lē tuuina ia i latou le avanoa e avea ai ma taitai ma galulue ai i ni vaega e mafai ona latou faia ai ni fuafuaga ma ni faaiuga.
O la‘u fautuaga vaivai, silasila i le tamaoaiga o alo ma fanau nei. O le manatu o loo faaseseina ai i tatou o le faapea, o le tupulaga o le lumanai lea o le ekalesia.
O lo‘u lagona, o le tupulaga o le ekalesia lea o le asō atoa ai ma le lumanai. A tatou faatali mo le lumanai pe se‘i matutua i latou, ua fai si tuai.
Na faauuina e le Atua Tavita e fai ma tupu a o talavou lava o ia. Ona toe foi lea o Tavita i le galuega o le leoleo mamoe. Peitai ua uma ona filifilia.
O ai talavou o loo silasila i ai lau susuga i le taitai i le taimi nei o loo iai le agavaa e mafai ona avea ma taitai o le lumanai? Tuu i ai le avanoa nei e a‘oa‘oina ai o ia i le tulaga faataitai.
O nai manatu nei e fesoasoani i le tofia ma le filifilia, atoa ai ma le a‘oa‘oina o taitai mo le lumanai.
1. Vaai poo ai i latou nei. Talatalanoa i ai e uiga i lo latou lumanai.
2. Tuu i ai avanoa e faataitai ai i tulaga faataitai. Tuu i ai le Tusi Paia na te faitaua i se isi Aso Sa. Tuu i ai le tatalo e fai. Tuu i ai le ki o le falesa na te tatalaina ma lokaina.
3. Valaaulia lua te o i ni fonotaga poo ni mafutaga e iai isi taitai.
4. Valaaulia o ia e sau i fono a taitai se‘i faalogologo i auala e talanoa ai taitai, faapea ai ma auala e faatautaia ai fonotaga ma faia ai faaiuga. O se faleaoga tāua tele lea mo le taitai o a taeao.
5. Tuu i ai ni galuega faatino na te taitaia e pei o se galuega, poo le tapenaina o ni taaloga, e oo lava i le a‘oa‘oina o se vasega i le aoga Aso Sa.
6. Tuu i ai folafolaga i le Aso Sa na te faia ae mālōlō tasi le fofoga o le ekalesia.
E tele nisi o auala faatino faapea e fesoasoani ai i le faatupuina ma le a‘oa‘oina o le taitai fou. O le auala lea na faia e Keriso.
E tolu ma le ‘afa tausaga o a‘oa‘oina e Keriso i latou ma tuu avanoa i ai e faatinoina le galuega. E lei faia e Keriso mea uma, ae sa ia tuuina le pule i lona ausoo, o taitai o le ekalesia i le lumanai e faataitai ai ma faatino ai le galuega.
E tatou te iloa mai le Feagaiga Fou, e tele lava ni mea sese a le ausoo na fai ona o le lē malamalama. Peitai na tuu avanoa i ai Keriso.
O ai o e tuu avanoa i ai? O ai o loo e tuuina atu i ai le pule, poo e uumauina uma le pule?
Ia iai pea le filemu o le Atua ma le alofa e taitai ai ona tagata, aemaise le poto ma le faautauta.
Soifua
Lui Ponifasio
www.luiponifasio.wordpress.com
