I le Suafa o le Alii o le Toetu o Keriso Iesu e faafeiloai atu ai ma faatalofa atu i le paia ma le mamalu o Samoa le atunuu pele. E afua mai i ona taitai seia paia se iti, malo le soifua.
I le lalolagi atoa o loo ua faamanatuina ai le Eseta poo le Aso Sa o le Toetu e pei ona mavae atu.
O le talitonuga faa-Kerisiano o le aso na toe toetu manumalo ai le Alii Faaola mai le tuugamau ma le oti.
Atonu e lē tāua le aso ma le vaitau e pei ona faamanatuina ai foi le aso
Kerisimasi, o le aano e tāua, ina ia o tatou manatua pea le tāua o le togiola na faia e Keriso i luga o le satauro ina ia maua e i tatou le ola e faavavau.
O le galuega na faia e Keriso o le tuuina atu lea o lona soifua e sui ai le agasala a oe ma a‘u, o le ofoina atu o lona soifua mo le isi.
O se faataitaiga sili ona lelei mo soo se tagata ua avea ma taitai.
O Keriso o le Ao poo le Ulu o le Ekalesia. O le tumutumuga lea ma le autū. O tagata Kerisiano ua faatusaina lea o le Tino o Keriso.
O le ao poo le ulu o le tagata e ave i ai le faaeteete, le faamuamua ma le faaaloalo. O le ulu foi o le tagata e muamua ave i ai le tapenaga ina ia lelei ma foliga matagofie.
O le vaega foi lea o le tino o le tagata se‘i tulou e umi le taimi e tapena ma teuteuina ai i aso uma. O le seluina o le ulu, o le fufuluina o nifo, o le faamamāina o mata ma isi tulaga uma faapena ina ia matagofie.
O le ulu foi o le tagata i ona foliga e maitauina ai foi le tagata. A lelei ou foliga, ua tauleleia uma le tino. A lelei foi au faamatalaga ma saunoaga e faia e lou ulu e ala i lou fofoga, o le a faapea foi ona tauleleia uma le tino atoa.
E oo foi i le faaaogāina o le mafaufau, a lelei ua ta‘ua oe o se tagata poto. A lē lelei foi ona faaaogā le mafaufau o loo i totonu o le ulu, o le a faapea foi ona faia e tagata faamatalaga e faaleagaina ai au faaiuga ma au tonu na faia.
O le ā le mea o loo o‘u taumafai e faamatala atu? O le ulu e tāua mo le lelei o le tino atoa. Poo le ā le aulelei o ou tamatamai lima poo ou vae foi, e vaai lava tagata i lou ulu poo ou foliga.
Soo se faalapotopotoga ma soo se ekalesia, poo le ā le lelei o tagata o loo iai, e muamua lava ona vaai tagata i le faauluuluga poo le taitai.
E masani ona fesili tagata poo le ā le lotu e te lotu ai. O le isi fesili e sosoo ane ai, “O ai le igoa o le tou faifeau?”
O Keriso le Ao o le Ekalesia, na ia tuuina atu lona soifua ina ia manuia ma lelei tagata uma. O se faatusa foi lea o se galuega o loo faia e taitai o le Ekalesia poo le faifeau.
E tuuina atu lona ola, e ala i lona taimi, malosi, agavaa mo le lelei o isi, ina ia maua e tagata le faaolataga e ala ia Keriso.
O le tulaga faigata lea i le galuega faataitai, ae ou te talitonu e aumai lava e le Atua le malosi ina ia faataunuuina ai le valaauina.
O loo tatou talatalanoa pea e uiga i le mafuaaga ua tele ai ina lē toe auai le tupulaga talavou i le lotu, aemaise lava i latou ua sili atu i le 20 tausaga ma luga atu.
O nisi o mafuaaga na a‘oa‘oina ai a‘u ina ua ou fesilisili i le tele o tupulaga talavou pe aisea ua lē fiafia ai e o i ni lotu.
O nisi nei vaega:
1. Musika / Pese
Afai e lelei lau maitau, soo se tama ma se teine talavou e matuā fiafia lava i le musika. O aso ia o e talavou sa faapena foi ona e fiafia i musika ma pesega. A oo ina faasolo matua le olaga ona leai tele lea o se naunau i musika ma pese.
O se tasi lenei o vaega e feteenai ai tele le tupulaga ma tagata matutua. E lē gata i totonu o aiga, ae faapea lava i totonu o Ekalesia.
O le musika o se meafaigaluega lea na te faatinoina se galuega. O le musika e pei o se loli o loo ia momoliina se uta. Ou te faatusaina e pei o se loli pusasasaa o loo sau ma se uta oneone.
O le tele la o taimi e mananao ai tagata matutua i le uta oneone ae mumusu i le pa‘ō o le loli.
Tatou te mananao ia taunuu mai le tupulaga talavou i le lotu ae tatou te lē mananao i le pa‘ō o a latou musika.
E iai lo‘u talitonuga e leai se afaina i le Atua o le leotele o a tatou musika, o mea faaili. E lē faapea la o le soona tata ma leo tetele e leaga ai taliga se‘i tulou. Ae a mafai ona faaaogāina ni musika faaneionapo ma mea faili eseese ma ituaiga o pese eseese, ou te talitonu o le a faapea foi ona fiafia le tupulaga talavou e auai i sauniga.
Ou te manatua, ina ua taumafai e fai se suiga i le musika i totonu o le matou Ekalesia, sa lei faigofie foi.
Peitai ou te faafetai i le Atua i nai tamā ma tina matutua sa mafai lava ona latou tuu avanoa i nai fanau.
E ui lava i le leo tetele foi o mea faaili ma le masini faaleo tele leo ae sa onosai ai lava i lea vaitau.
Sa iu lava ina ou fai i ai i le isi aso, “Afai ua leotele le mea faaili (ona o nisi e fai masini faalogo i taliga) ona aumai lea o ni mea tuutaliga”.
O le Aso Sa na sosoo ai na ou vaaia ai se tasi o tamā matua o le matou ekalesia ua sau i le lotu ma mea tuutaliga lea e faaaogāina i taimi e moa ai vao.
E ui lava e foliga mālie, ma pei e lē lelei le tulaga ua faia e lenei tamā, ae sa iai lona naunau ina ia omai le tupulaga i le lotu.
E lei leva ona amia e le Atua si o matou tamā matua lea, ae maliu o ia ua matuā toatele le tupulaga talavou e fou mai i le lotu. E lē gata i lea o si ona alo laiitiiti lea ua avea nei ma taitai o musika ma viiga o le Atua i totonu o le matou Ekalesia.
A o tatou talanoa ai foi i musika ma viiga o le Atua, ou te manatu e tatau lava ona faaaogāina ituaiga o musika eseese atoa ai ma ituaiga ma faiga eseese.
O le aufaipese, o le faaili, e oo foi i pese faasamoa, e pei ona lagiina e aunoa ma ni meafaaili.
2. Laei
O se tasi nei o vaega i totonu o sauniga ma ekalesia e fai foi si ona faigata. E lē o iai se manatu i lenei tusitusiga e faatonu ma aoaia e laupua tamafaiga auā e tofu foi le ekalesia ma ana faiga ma ana tu ma aga faaleekalesia.
Ae ui i lea, o se tasi o manatu o le tupulaga talavou, o le manao lea e oofu i latou i ofu e fiafia i ai aemaise o laei faaonopo nei, ia pe tuu i se faaupuga lata mai o “sitaili”.
O nisi o tupulaga ua lē fia o i le lotu ona e mumusu e oofu ia laei lotu e pei ona tatou masani mai ai.
A iai se avanoa e mafai ai ona iai se suiga i lea vaega, ou te talitonu o le a fesoasoani lea i le tosinaina mai o le tupulaga i le lotu.
E sili atu ia te au le sau o lou atalii i le lotu ma le mitiafu ma le ofu vae pupuu nai lo le lē sau ona o loo o‘u taumafai e faamalosi e fai le pea papae ma le fusiua.
E ui i nei vaega e pei ona ta‘ua, o le gagana, musika, o laei ma nisi o vaega e foliga mai o mea la le tino, o se tasi o vaega e talitonu ua mafua ai le toatele o tupulaga talavou ua lē fiafia i mea faaleagaga poo le lotu, ona ua tau leai se avanoa i totonu o o tatou aiga e a‘oa‘oina, ma faamanatu ai le tāua o le Atua i le olaga o le tama ma le teine talavou.
Ua vaivai le talanoa i mea tau le Atua, ua leai ni avanoa e tatalo ai ma faitau le Tusi Paia. E lē gata i lea, o le faatagaina o i latou e auai i isi polokalame poo mafutaga faaautalavou e unaina ai le ola faaleagaga.
O le vaega lea e talitonu o le a pa‘ū lea i le galuega a mātua, o i latou ua avea ma taitai i totonu o aiga.
O le galuega a le faifeau ma taitai faaleekalesia e faalagolago tele i le galuega a mātua.
E tasi pe lua itula i le vaiaso e faia ai le galuega a le faifeau i le a‘oa‘oina o le Afioga a le Atua ma le ola faaleagaga, peitai o mātua o loo nafa ma le fanau i aso uma.
O le muagagana e masani ai e faapea “E logo le tuli o le tata”. O le matafaioi lea mo taitai o aiga taitasi.
Manatua foi e afua mai mauga tetele le manuia o mauga iti.
Ia faamanuia le Atua ia te oe i lenei vaiaso.
Soifua
Lui Ponifasio
www.luiponifasio.wordpress.com
