E lei avea ile faamasinoga e le susuga Afereti Uili le finagalo ole au Toeaina na faamalolo ai lona tofi Failautusi Aoao ole Ekalesia a‘o faatali se faaiuga ale faamasinoga maualuga i lana mataupu na tuuina atu iai faasaga ile nusipepa ole Samoa Today na faasalalauina se lipoti o tuua‘iga ase tamaitai ise fesootaiga faaulugalii ma le faifeau.
Na matuā teena e Afereti le lipoti ma tuua‘iga lea na taunuu ina faamama ai le suafa ole faafeagaiga. Peitai e aumai lea finagalo ole soalaupulega ile va ole susuga Afereti ma le tamaitai na faia le tuua‘iga ua faamuta e le Au Toeaina le tofi Failautusi. Sa finau le faifeau sa tatau ona faatali le Au Toeaina ise faaiuga o lana mataupu mai le faamasinoga.
O lea ua mae‘a le Fonotele i Malua o lenei tausaga ma ua fausia ai se finagalo o usugafono eseese ile totogi atu e le ekalesia aoao ose taui tupe e $150,000 ile faifeau.
Oloo ta‘ua e faapea ole totogi ole tofi failautusi lea na aveesea mai le faifeau ua aofia ile aofaiga ole seleni ua ioeina ma pasia e le Fonotele.
Ole tasi lea o mataupu sa lagalaga ai lagona o nisi ole ekalesia ina ua faamuta e le Au Toeaina le tofi Failautusi ole susuga Afereti ae e lei maua se taunuuga ole mataupu ile tulafono. Talu ona faamalolo le tofiga e lei toe maua e le faifeau se faamanuiaga tau tupe mai le ekalesia auā e le o tausi nuu.
Ose talanoaga ma Afereti ile tausaga ua mavae na ia faaalia ai e leai sana tagi faasaga ile Au Toeaina ona e alofa ile ekalesia ae ua sailiili sana galuega e tausi ai lona aiga. Ole vaegatupe ua pasia nei mo le susuga Afereti e le tau fesiligia ose faamanuiaga ua tatau ma fetaui, auā pe a fua ile Fonotele ole tausaga ua mavae na faamuta ai lona tofiga ae faatoa tasi le tausaga talu ona ia tauaveina lea tofiga maualuga ole ekalesia.
E lei toe aliali mai se isi laasaga ua oo iai le isi tagi ale susuga Afereti faasaga ile pulega ole nusipepa na faasalalauina le lipoti e lē moni. Ose tagi ole tau faaleaga oloo tuua‘ia ai le Faatonu ma le tusitala na faia le tusitusiga.
Ole pulega ole Samoa Today poo le nusipepa na faia le lipoti, ose konekarate sa faia le galuega ole toe faafouina ole Maota ole Ioane Viliamu i Tamaligi i Apia e pei ona iai vaaiga fou ile tino atoa ole Maota.
