[et_pb_section fb_built=”1″ _builder_version=”4.3.2″][et_pb_row _builder_version=”4.3.2″][et_pb_column _builder_version=”4.3.2″ type=”4_4″][et_pb_text _builder_version=”4.3.2″ hover_enabled=”0″]
Europa
E maoa’e le sosolo o le faama’i talu le vaiaso ua tea. I le taimi na tusia ai tala mo le vaiaso ua tea e na’o le 400 tagata maliliu na ripotia mo Italia, ae o lea ua oo i le 1,809.
E 1,409 tagata maliliu i Italia i le va o le Aso Gafua o le vaiaso ua tea ma le Aso Gafua o le vaiaso nei, e matautia le pepesi o le faama’i. E faapea foi foliga o fuainumera mo Sepania e 275 tagata maliliu i le vaiaso e tasi, ma Irani e latalata i le 500 tagata maliliu.
O fuainumera foi ia o tagata ua maua i le faama’i aemaise i Europa. E 18,000 tagata mama’i fou i Italia i le vaiaso e tasi, o Irani e 7,500 gasegase fou i le vaiaso, o Farani e ova ma le 4,000 tagata ua maua i le faama’i i le vaiaso e tasi.
Ua faapea foi ona siitia maualuga fuainumera o tagata aafia i Sepania, Siamani ma isi atunuu i Europa. O Europa lea ua tutotonu i ai le faama’i.
O atunuu uma i Europa ua tapunia le tele o a’oga, fale mataaga, taaloga ma feuia’iga i le va o atunuu ona o le faama’i.
Italia
Ua lē mafai e falemai a Italia ona togafitia le toatele o tagata ua maua i le faama’i. Ua fai ai le faaiuga a le atunuu o le a lē toe togafitia tagata mamai i luga atu o le 80 tausaga le matutua.
Sepania
I Sepania ma Italia ua tapunia nei tuaoi o atunuu nei e lua ona o le taofia o le faama’i mai le ofi atu i totonu. E ui i lea taofiga, peitai, ua fai lava si tuai auā ua faitau afe ma afe tagata ua mama’i i totonu o atunuu e lua.
Amerika
E telē le pagatia o Amerika i le faama’i, ua ova ma le 3,600 le aofai o tagata ua aafia i le faama’i. Ua taofia e Amerika le malaga atu o tagata mai Europa, faatasi ai ma Peretania ma Aialani. I le taimi o tusitusiga o le vaiaso ua tea nei e na’o le 19 tagata maliliu ae ua ova ma le 63 ua fano i le coronavirus i totonu o Amerika. O loo iai le popolega a le Soifua maloloina e maualuga atu le fuainumera ae lē o mailoa i le taimi nei ona o le tuai ona fai suesuega a foma’i i le siama.
Ausetalia
Ua mulimuli Ausetalia i tulafono a Niu Sila ma faatulafonoina ai le nofo ese o tagata uma e malaga atu i totonu o Ausetalia mai soo se atunuu.
Niu Sila
Ua faatulafonoina e Niu Sila le nofo ese ai o tagata e malaga mai i Niu Sila mai atunuu uma o le lalolagi seia vagana atunuu o le Pasefika e iai Samoa.
Pasefika
O loo tatala pea le tuaoi o atunuu o le Pasefika ae ua faatulafonoina e Fiti ma Samoa suesuega faavairusi CoV-19 mo tagata e malaga mai atunuu e 33 o loo aasa ai le faama’i, e iai ma Ausetalia i le lisi lea. A’o isi atunuu uma e iai Niu Sila e ao ona iai pepa a le foma’i mai le tolu aso a’o loma le malaga e faatagaina ai le ofi atu i Samoa ma Fiti.
Ua tasi le tagata e ma’i a le Pasefika, o le tamaitai faipule i Tahiti na malaga i Farani ma toe foi atu ai i Papeete ma le faama’i.
E matuā saoasaoa lava suiga o aafiaga o le faama’i. O ā ni tusitusiga oi luga e oo atu i aso e sosoo ai ua suia atoa le aofaiga o tagata ua aafia ma le aofai o tagata maliliu.
[/et_pb_text][/et_pb_column][/et_pb_row][/et_pb_section]
